Një ditë në rafting

Është ende herët dhe Zamo Spathara me kolegët e tij nisen nga Berati drejt lumit të Vjosës. Për të shtuar aventurën e këtij udhëtimi drejt Përmetit ata zgjedhin rrugën e vjetër të ndërtuar gjatë luftës italo-greke.

“Kjo rrugë ka qenë e mbajtur shumë mirë, por tani është një rrugë e tipit “safari” dhe ne e përdorim për aventurën tonë”, shprehet Zamo.

Megjithëse është vetëm 70 kilometra, kjo rrugë realizohet për rreth katër orë dhe është e kalueshme vetëm për makinat 4×4.

Gjithçka është gati. Grupi prej 15 turistësh nga Kosova ka mbërritur dhe secili pasjiset me veshjen e përshtatshme e mjetet mbrojtëse. Të gjithë janë gati dhe aventura në lumin e Vjosës fillon tani.

Për shkak të mungesës së reshjeve të shiut, rrjedha e Vjosës nuk është në nivel shumë të lartë. Megjithatë barkat me nga 6 persona luftojnë se kush do të arrijë i pari në finish. Pjesët më të bukura, ku edhe emocionet shtohen, sigurisht që janë rrjedhat me ujë të rrëmbyer, të cilat nuk mungojnë në luginën e lumit që buron nga Janina.

Aventura në  rafting përfundon pas katër orësh lundrim. Grupi I turistëve nga kosova ka mbetur shumë I kënaqur nga kjo ekperiencë. Arben Lila tregon se shqipëria është pjesa kryesore e guidës së tyre turistike dhe bukuritë e vendin tona janë mahnitëse.

Një pjesë e grupit kanë kryer 500 kilometra rrugë me biçikletë nga Peja në qytetin e Vlorës në nder të 100 vjetorit të shpalljes së pavarësisë. Pjesë e këtij turi ka qenë edhe 64-vjeçari Blerim Peja, i cili vjen për herë të parë në rafting. Rafting është një sport për të gjithë. Dentisti Luan Hoxha tregon eksperiencën e tij: “Ishte shumë emocionuese të përshkoje të gjithë itinerarin pasi sheh bukurinë e Shqipërisë.”

Ky ishte vetëm një nga udhtëimet emocionuese që organizon Federata e “Rafting Albania” në lumejntë e Shqipërisë.

Top Channel