Lifestyle

Greqi, kriza “kalb” edhe makinat

11/09/2012 17:05

Ndërsa kriza financiare në Greqi thellohet, mijëra makina, motoçikleta, furgonë dhe autobusë degradojnë në magazinat shtetërore, si rrjedhojë e pamundësisë së shtetasve për të blerë një mjet, pavarësisht çmimeve më të lira se kurrë.

Mbyllja e një Agjensie Shtetërore për Administrimin e Pasurisë Publike (e njohur në greqisht si “ODDY”), ka krijuar një stok të madh makinash, të cilat mbeten të pashitura.

E formuar në vitin 1946, agjensia ishte specializuar në tenderimin e mjeteve të sekuestruara nga trafikantët e drogës dhe kriminelët e tjerë dhe përbënte një mundësi të mirë blerje për grekët e thjeshtë.

Megjithatë, që prej vitit 2009, agjensia nisi të regjistronte vetëm humbje në bilancet e saj, duke bërë që më në fund të mbyllej nga Athina zyrtare, në kuadrin e paketës së saj të shkurtimeve të dhimbshme që po ndërmerren.

Aktualisht, në magazinat e agjensisë ndodhet me mijëra mjete, mobilje apo sende të tjera, por janë shumë të paktë ata që interesohen për blerjen e tyre dhe likuidimi i pasurisë së konfiskuar po shndërrohet në një problem më vete, duke ilustruar edhe një herë më shumë thellësinë e krizës që po përjeton fqinji ynë jugor.