Europa League, norvegjezët: Tirana formalitet

Në një intervistë për të përditshmen “Dagbladet”, ndihmëstrajneri i kombëtares norvegjeze, kundërshtare e Shqipërisë në kualifikueset e Botërorit të vitit 2014, e konsideroi skuadrën më të suksesshme të futbollit tonë si një “formalitet” për formacionin skandinav.

”Një prej arsyeve përse klubet tona nuk arrijnë të bëjnë një paraqitje të mirë në Europë është fakti se u mungon qëndrueshmëria. Një skuadër mund të jetë e mirë për një vit, por nuk ndodh kështu vitin e ardhshëm dhe si rrjedhojë, nuk arrijmë asnjëherë larg”, vlerësoi trajneri Ola By Rise.

”Prej kohësh, Rosenborg ka qenë ajo skuadër që na ka përfaqësuar larg, por mendoj se tashmë edhe ekipe si Tromso apo Aalesundi mund t’ia dalin. Këta të fundit kanë një short veçanërisht të favorshëm, ndaj një skuadre modeste si Tirana dhe besoj se ka ardhur momenti që qëndrueshmëria e Aalesund në këto vitet e fundit të shpërblehet me kualifikim deri në fazën e grupeve”.

Një vit më parë, skuadra norvegjeze mori pjesë gjithashtu në Europa League, ku u eliminua një hap larg fazës së grupeve, në plejof, nga AZ Alkmar, pasi kishte siguruar kualifikimin ndaj Ferencvaroshit hungarez dhe Efsborgut suedez.

Megjithatë, pavarësisht vlerësimeve pozitive të ndihmëstrajnerit të kombëtares norvegjeze, duhet thënë se Tirana nuk përballet me një skuadër në kulmin e saj, sepse Aalesundi vjen në këtë edicion si fitues i Kupës, por pas një kampionati tejet zhgënjyes, në të cilin u rendit vetëm në vendin e nëntë.

Ndërkohë, kompanitë europiane të basteve, për ndeshjen e “Qemal Stafës”, në plan për t’u zhvilluar ditën e enjte, e japin fitoren e Tiranës rreth kuotave 2.8, barazimin 3.1 dhe suksesin e norvegjezëve në transfertë me 2.2.

Top Channel