Nano sulmon Berishën

Në një deklaratë për shtyp, Fatos Nano sulmon kryeministrin Sali Berisha për qendrimin e tij pro kryetarit të Komisionit Qendror të Zgjedhjeve, Arben Ristani.

“Qëndrimi i Kryeministrit Sali Berisha në mbështetje të Kryetarit të KQZ-së Arben Ristani është as me pak e as me shume por vazhdimesia kokeforte dhe driteshkurter e mendesise dhe udhetimit politik aventuresk, qe ngushton demokracine, privatizon dhe partiakizon institucionet, si edhe demton e pengon integrimin”, thuhet në deklaratë.

Për Fatos Nanon Sali Berisha po dëshmon me këmbëngulje se është i paaftë të ndërtojë një shoqëri të lirë, të drejtë, demokratike dhe të denjë për të merituar integrimin.

“Sali Berisha punon veç për partinë e tij dhe  për betejën e ardhshme elektorale, duke keqpërdorur dhe akaparuar shtetin, e njëkohësisht  duke cënuar e dëmtuar zhvillimin e vendit dhe integrimin europian. Sali Berisha po dështon me vullnet të lirë që të jetë një shtetar, duke u konfirmuar dhe afirmuar në çdo akt, vendim e veprim si një partiak i modelit të lënë pas në vitin 1990”, vijon deklarata.

Sipas lëvizjes së Nanos, Arben Ristani është modeli dhe fryma e privatizmit dhe partiakizimit  të institucioneve të shtetit shqiptar, dhe si i tillë ai nuk mund të jetë më pjesë e vazhdimësisë, kur në lojë është reformimi europian i vendit.

“Me avokatinë që i bën Arben Ristanit dhe me flamurin e Partisë Demokratike, që nga sot do të fillojë të valëvitet në zyrën e Ministrit të Brendshëm, Sali Berisha vetërrëfehet i orientuar drejt udhës që rrezikon reformat, kërcënon zgjedhjet e lira dhe të ndershme dhe ndëshkon shqiptarët me dështimin e radhës me mosmarrjen e statusit kandidat”, thuhet më tej në deklaratë.

Top Channel