Malaga është interesuar për mundësinë e blerjes së sulmuesve të Milanit Antonio Cassano dhe Robinho. ‘La Gazzeta dello Sport’ publikon se klubi spanjoll do të tentojë transferimin në Spanjë e të paktën njërit prej futbollistëve kuqezinj në merkaton e verës.
Cassano dhe Robinho kanë kontratë me Milanin deri në vitin 2014. Italiani përfiton një pagë prej 3 milionë eurosh në sezon, ndërsa braziliani plot 6 milionë euro.
“Për momentin drejtuesit e Malagës nuk kanë shfaqur preferencë, por rroga më e ulët e Cassanos e bën atë më tërheqës”, shkruan gazeta milaneze.
Malaga kërkon të përforcojë ekipin në mënyrë që të bëjë një paraqitje sa më dinjitoze në Ligën e Kampioneve pas arritjes së kualifikimit për sezonin e ardhshëm në kompeticionin më të rëndësishëm europian.
Klubi me pronar arab përfundoi në vendin e katërt të kampionatit spanjoll falë investimeve të shumta, mes të cilëve lojtarë si Joaquin, Van Nistelrooy dhe Demichelis.
Top Channel
