Chelsea zyrtarizon: Drogba largohet
22/05/2012 17:55
Maratona e Tiranës rikthehet me edicionin e tetë më 20 tetor, çmimet për 4.000 garues 28/09 12:49
Didier Drogba do të largohet nga Chelsea në fund të sezonit edhe pse me këtë ekip sapo është kurorëzuar kampion i Europës pas fitores në finalen e Champions League ndaj Bayern Munchen të shtunën e kaluar.
Lajmin e ka bërë të ditur klubi londinez në faqen zyrtare në internet. Futbollisti nga Bregu i Fildishtë është shprehur: “Konfirmoj largimin nga Chelsea. Ishte një vendim i vështirë për mua, por jam krenar për atë që kemi arritur. Tashmë vjen momenti i një tjetër sfide në karrierën time.”
“Si ekip kemi fituar të gjitha trofetë e mundshme, por të shtunën ishte një ditë shumë e veçantë për të gjithë klubin dhe tifozët. Jam krenar që ndihmova Chelsea-n për fitimin e Ligës së Kampioneve”, shtoi Drogba, i cili me golin e barazimit të rezultatit në 1-1 dhe me golin përcaktues në serinë e 11-metërshave i dha fitoren klubit të Roman Abramovich për herë të parë në histori.
Didier Drogba ka fituar me Chelsea 3 tituj kampion (2005, 2006 dhe 2010), 4 Kupa të Mbretëreshës (2007, 2009, 2010 dhe 2012) dhe 2 Kupa të Ligës Angleze (2005 dhe 2007).
Në dy raste është shpallur golashënuesi më i mirë i kampionatit anglez (2007 dhe 2010).
Top Channel
