Jose Mourinho deklaroi për kanalin portugez ‘SIC’ se Cristiano Ronaldo duhet të fitojë Topin e Artë këtë vit sepse golat e tij i dhanë titullin kampion Realit të Madridit.
“Cristiano meriton Topin e Artë sepse golat e tij na dhanë një titull. Messi ka shënuar më shumë, por golat e tij nuk vlejtën për asgjë, ashtu siç nuk vlejtën golat e Ronaldos gjatë sezonit të kaluar. Vitin e shkuar Messi shënoi më pak gola se Ronaldo dhe fitoi Topin e Artë. E njëjta gjë duhet të ndodhë sivjet dhe çmimi duhet t’i shkojë atij që ka bërë gola më me peshë”, theksoi Special One.
Në lidhje me performancën që pritet nga Cristiano Ronaldo me kombëtaren portugeze në Euro 2012, Mou u shpreh: “Portugalia dhe Reali janë dy skuadra të ndryshme. Në kombëtare nuk ka ekipin që ka luajtur gjatë gjithë vitit në Spanjë. Nuk mund të presim 10 apo 15 gola nga ai edhe pse është më i miri në botë.”
Real Madrid për momentin ndodhet në Kuvajt ku do të luajë një ndeshje miqësore me kombëtaren e këtij vendi.
Top Channel
