PS, tryeza për zhvillim afatgjatë

Ndërsa lideri socialist Edi Rama theksoi se asnjë ministri në Shqipëri nuk gjen dot një plan territorial si pjesë e një plani kombëtar. Rama komentoi edhe të dhënat e fundit që vijnë nga FMN në lidhje me ekonominë shqiptare.

“Sot, në 2012-ën, rritja parashikohet 0.8 për qind. Parashikimi përputhet me një realitet ekonomik e financiar ku vazhdojnë vjedhiet. Tani Shqipëria po hyn në projeksionin e parashikuar prej nesh. Ekonomia shqiptare ka ngecur sepse nuk ka një model zhvillimi”, deklaroi Rama.

Duke u ndalur në konçesionet e firmosura nga qeveria Berisha, kreu i opozitës ka përgënjeshtruar zërat se me ardhjen e socialistëve në pushtet do të ndodhë anulimi i tyre.

“Kryeministri bën një deklaratë absurde ndaj opozitës, duke thënë se ne do të heqim konçesionet. Konçesionet janë bërë pre e klientelizmit, kështu që ne do t’i rishikojmë dhe jo anulojmë”, tha më tej Rama.

Pasditen e së hënës PS mblodhi tryezën për politikat fiskale, ku Rama deklaroi se politika, sipas tij, e gabuar e qeverisë solli rritje zero të ekonomisë.

Një tjetër pikë e prekur nga lideri i opozitës gjatë kësaj tryeze ishte propozimi për taksën progresiste, për të cilën ai i bëri thirrje qeverisë që ta miratojë sa më parë.

Top Channel