Tirana dhe Skëndërbeu hodhën një hap të sigurt drejt finales së Kupës së Shqipërisë, duke fituar bindshëm ndeshjet e para gjysmëfinale, të zhvilluara të mërkurën.
Nga ana e tyre, bardheblutë arritën të regjistronin një fitore të papritur në Vlorë, ku ndeshja nisi menjëherë mbarë nëpërmjet një goli të Dushkut, që në minutën e tretë.
Dukshëm larg nivelit të tyre më të mirë, vlonjatët u vunë përfund nga dy gola pas intervalit, me autorë Cikalleshi dhe Tushen, që në minutat shtesë i vendosi vulën kualifikimit praktikisht të sigurt të fituesve në fuqi të Kupës së Shqipërisë.
Në ndeshjen tjetër gjysmëfinale, atë midis Skëndërbeut dhe Kastriotit, kampionët në fuqi treguan epërsinë e tyre ndaj krutanëve. Pasi realizuan në minutat e para, nëpërmjet Plakut, i “zakonshmi” Inkango barazoi shifrat menjëherë, por pjesa e parë u mbyll në avantazhin e korçarëve, pasi Radas realizoi një gol të dytë.
Në pjesën e dytë, një gol i hershëm i Bratiç “vulosi” shifrat në 3-1, ndërsa vendasit patën edhe shanse të tjera për të fituar takimin edhe me shifra më të thella. Rezultati favorizon qartësisht Skëndërbeun për të kaluar turin, ndonëse i lë disa shpresa, gjithsesi të vakëta, Kastriotit për ndeshjen e kthimit.
Top Channel
