Reforma, Obama paralajmëron gjykatën

Në një sfidë të rrallë ndaj institucionit më të lartë gjyqësor amerikan, zoti Obama tha se rrëzimi i ligjit do të dëmtonte miliona amerikanë. Gjykata e Lartë pritet ta shpallë vendimin e saj në qershor.

Obama tha në një konferencë për shtyp në Shtëpinë e Bardhë se ai ishte besimplotë se, “ata nuk do të ndërmarrin një hap të papreçedent për rrëzimin e ligjit që u kalua me një shumicë të fortë të zgjedhur në mënyrë demokratike në Kongres”.

“Unë vetëm do t’u kujtoja komentatorëve konservatorë se, për vite të tëra ajo që kemi dëgjuar është: problemi më i madh mbi tryezë ishte aktivizmi gjyqësor, ose mungesa e përmbajtjes së gjyqësorit, që një grup personash të pazgjedhur në një farë mënyre do të shfuqizojnë një ligj të miratuar”, deklaroi Obama.

“Epo, ky nuk është një shembull i mirë. Unë jam besimplotë se kjo gjykatë do ta pranojë dhe nuk do ta ndërmarrë këtë hap”, shtoi presidenti i Shteteve të Bashkuara. Ai gjithashtu u bëri thirrje kritikëve të reformës të mos harrojnë “elementin human” të debatit.

Gjykata e Lartë kaloi tre ditë javën e kaluar duke marrë në shqyrtim sfidën ligjore të udhëhequr nga republikanët nga 26 shtete për ligjin në fjalë, që u miratua në Kongres dy vjet më parë.

Top Channel