Pendimi i Emmanuelle Beart

Bëhet fjalë për aktoren franceze Emmanuelle Beart, që për të përditshmen “Le Monde” ka treguar të vërtetën mbi një prej tipareve të saj, që prej 20 vitesh i ka “hequr trurin” meshkujve. Por aktorja ka rrëfyer se tipari në fjalë nuk është vepër e nënës natyrë, por e një kirurgu plastik.

“Operova buzët kur isha 27 vjeç sepse nuk më pëlqenin. Por ishte një telash i vërtetë. Tek e fundit, kur një person vendos të ndryshojë diçka e bën këtë sepse nuk duron dot të jetojë me atë pjesë të trupit që e konsideron difektoze dhe për rrjedhojë ose e lufton idenë e një operacioni plastik, ose i nënshtrohet”, ka treguar Beart.

Por, pavarësisht se në atë kohë rezultatet e ndërhyrjes i pëlqyen, sot aktorja e mirënjohur në Evropë dhe më gjerë, pranon se është penduar për shkak të pasojave që operacioni i ka lënë 20 vjet më pas.

“T’i nënshtrohesh një ndërhyrjeje është diçka serioze, pasojat e të cilës nuk i parashikon dot, sepse është diçka që prek shpirtin tonë”, ka thënë më tej aktorja.

Emmanuelle Beart është fituese e një çmimi Cesar për filmin “Manon des Sources”, ndërkohë që njihet edhe për interpretimin në episodin e parë të sagës “Mission: Impossible”.

Top Channel