Flaka Krelani, e ftuar në emisionin ‘Pasdite në Top Channel’, u shpreh se bota e muzikës shqiptare “duhet t’i japë hapësirë artistëve të vërtetë”.
“Është detyra jonë të edukojmë publikun, nuk është faji i publikut nëse dëgjon muzikë jo cilësore. Duhet t’i japim hapësirë artistëve të vërtetë që kanë krijimtarinë e tyre”, theksoi këngëtarja, e cila nuk është shumë dakord me muzikën komerciale.
“Unë konsiderohem anti-komerciale. Nuk them që komercializmi nuk është diçka e mirë, por personalisht nuk dua të dal jashtë vetes. Nuk do pranoja të këndoja “folk” edhe pse kjo rrymë shitet më shumë. Nëse do kisha shumë nevojë për para do punësohem diku, por nuk këndoj muzikë komerciale”, shton Flaka Krelani, e pasionuar pas muzikës “rock”.
Më tej, këngëtarja shtoi: “Unë kam publikun tim që më kupton dhe nuk ndihem e përjashtuar nga bota e muzikës. Unë e ndjej veten artiste dhe ndihem shumë mirë me atë që kam arritur. Unë do mundohem të sjell diçka ndryshe, por nuk largohem nga rryma ime. Unë kam vetëm 3 klipe muzikore për momentin sepse i jam përkushtuar më shumë festivaleve dhe këndimit live. Unë kam pasur mundësitë për të bërë edhe më shumë klipe, por tani po investoj për shkollën.”
Përsa i përket idhujve të saj, Flaka tregoi se Adele është këngëtarja e preferuar.
“Adele është e preferuara ime. Bota e spektaklit është lojë ku pamja e jashtme luan rol dhe për një kohë të gjatë nuk po dilte një këngëtar me muzikë dhe tekst që ka kuptim. Adele më në fund u shfaq dhe për mua është më e mira për momentin. E adhuroj”, deklaroi Flaka.
Së fundmi, këngëtarja lavdëroi edhe talentet që iu prezantuan publikut shqiptar në emisionin ‘The Voice of Albania’: “Ka qenë një format fantastik dhe do doja të kisha marrë pjesë. Ka pasur talente që më kanë habitur për sigurinë në skenë që kanë pasur që në fillim.”
Top Channel
