Obama: Irani bërthamor, i papranueshëm

Në intervistën e tij, Obama theksoi se nuk ka luajtur bllofin më parë kur ka kërcënuar Iranin me sulm dhe se i qëndron këtyre deklaratave, por shtoi se përpara komunitetit ndërkombëtar, një sulm i nxituar, pa provuar të gjitha metodat diplomatike, do të shërbente vetëm për të përforcuar reputacionin e Teheranit.

Irani, një shtet me 75 milionë banorë, pretendon se programi i tij bërthamor ka vetëm qëllime civile, por Agjensia Bërthamore e OKB-së ka hedhur dyshime serioze mbi mundësinë e zhvillimit të një program paralel armatimi.

Prej kohësh, në mediat ndërkombëtare kanë qarkulluar zërat mbi mundësinë e një sulmi izraelit ose amerikan mbi Iranin.

“Besoj se Izraeli, Irani dhe të gjithë vendet e tjera në botë e dinë se unë, si President i Shteteve të Bashkuara të Amerikës, nuk bëj bllof. Unë e kam bërë të qartë qëndrimin tim dhe rikonfirmoj se për ne, një Iran zotërues i një arme bërthamore është i papranueshëm. Megjithatë, ndonëse përdorimi i forcës për zgjidhjen e çështjes mbetet një opsion, kemi gjithashtu të qartë që ky është opsioni i fundit”, bëri të qartë Obama.

“Në këtë moment, sanksionet ekonomike po japin efekt. Aleati i vetëm ndërkombëtar i Iranit është Siria, që gjithashtu është e përfshirë nga trazira të shumta. Një sulm në këtë moment do të ndihmonte Iranin të portrezonte veten si një viktimë”.

Deklaratat e Presidentit të SHBA-ve erdhën në ditën kur Irani mbajti zgjedhjet e tij parlamentare dhe përpara takimit të së hënës me kryeministrin e Izraelit, Benjamin Netanyahu, një takim kyç për të përcaktuar qëndrimin e përbashkët të dy vendeve mbi zhvillimet në rajon.

Top Channel