PS: Albpetrol, aferë gjigande

“Duhet ta kuptojë cdo shqiptar që ato që po shiten tani janë të drejtat për shfrytëzimin e naftës dhe gazit. Po shiten përfundimisht. Nuk do ketë më kush të drejtë që të shfrytëzojë puset nafte në Shqipëri, përvec këtyre privatëve me bekimin e Sali Berishës”, thotë deputeti socialist, Erjon Braçe.

Qeveria thotë se shitja e të drejtave mbi naftën nuk i dëmton interesat kombëtare, pasi shteti do të marrë rentën minerare dhe taksat nga kompania private që do blejë Albpetrolin

“Rentë minerare nga Albpetrol shteti merr edhe sot, tatim-fitimi merr edhe sot. Por elementi që ikën nga pasuria publike është dividenti. Albpetrol deri më sot merrte dividentë.Nesër këtë divident do ta marrë privati”, u shpreh Braçe.

Privatit që do të blejë Albpetrolin qeveria do i japë të drejtën e ofertës së parë edhe për të gjitha koncesionet e tjera të naftës, qoftë kur investitorët aktualë tërhiqen apo edhe në përfundim të afatit të tyre pas 25 vitesh

“Imagjinoni një fëmijë që lind sot, fati i të cilit është përcaktuar për 25 vitet e ardhshme dhe në fund të këtyre viteve ai fëmijë do të jetë punëtor krahu në vendin e tij, asgjë më tepër, sepse pasuritë kombëtare të atdheut të tij, tashmë para se ai të lindë, Sali Berisha i ka privatizuar. Privatizimi i atdheut merr fund me privatizimin e Albpetrolit”, deklaroi Braçe.  

Shqipëria është vendi i vetëm i pasur me naftë në rajon dhe fusha e Patos-Marinzës konsiderohet si vendburimi më i madh i Europës Kontinetale.

“Ajo që është e tmerrshme në gjithë këtë histori është që ne eksportojmë naftë me cmime të lira dhe vit për vit shqiptarët, qytetarët shqiptarë, që janë zotër të kësaj toke, blejnë naftën e importit vit për vit e më shtrenjtë”, përfundoi deputeti socialist.

Shitja e Albpetrol de facto i jep fund privatizimeve në sektorin e naftës, ku shteti përvec transferimit të vendburimeve tek privati po heq dorë edhe nga të drejtat e posaçme mbi këto pasuri.

Top Channel