Nëntetar Peci dërgohet në Gjermani

Sipas informacioneve të fundit, Peci është dërguar për në spitalin ushtarak në Landstuhl të Gjermanisë, i shoqëruar nga një ekip mjekësh.

Ditën e mërkurë, Ministria e Mbrojtjes informoi për gjendjen shëndetësore të Pecit, duke deklaruar se kushtet e tij ishin përmirësuar dukshëm.

Përmes një komunikate, ministria sqaroi se nëntetar Peci ditën e djeshme ishte transferuar në një spital në bazën ajrore të Bagramit, i specializuar për ndërhyrje të vështira kirurgjike.

Ushtaraku shqiptar iu nënshtrua për disa orë një operacioni që përfundoi me sukses dhe sipas njoftimit, ai ndodhej tërësisht jashtë rrezikut për jetën.

Ministria e Mbrojtjes bëri gjithashtu të ditur se pret ende trupin e ushtarakut të vrarë, kapiten Feti Voglit, i cili ende nuk dihet me saktësi se kur do të mbërrijë në atdhe, ku i është rezervuar një ceremoni mortore në varrezat e dëshmorëve.

Gjithashtu, komandantit të grupit të parë special me shërbim në Afganistan i është dhënë titulli “Dëshmor i Atdheut”, si dhe i është akorduar nga presidenti i Republikës Medalja e Artë e Shqiponjës.

Top Channel