Kukan: Bashkëpunimi mes palëve të japë rezultatet e duhura

Në një takim me kreun e Republikës Bamir Topi, delegacioni i deputetëve të Parlamentit Evropian, kryesuar nga Kryetari i Delegacionit për Marrëdhëniet me Evropën Juglindore, Eduard Kukan, u diskutua rreth zhvillimeve në vend.

“Ne e konsiderojmë procesin e integrimit të Shqipërisë në Bashkimin Evropian, si një proces të bazuar tërësisht në performancë dhe meritë, i cili nëpërmjet realizimit të reformave është në interesin më të mirë të qytetarëve shqiptarë”, – u shpreh Presidenti Topi gjatë bisedës, bën të ditur njoftimi zyrtar i Presidencës.

Kryetari i Shtetit Shqiptar vuri në dukje se dhe kjo vizitë e eurodeputetëve tregon për mbështetjen pa hezitim të komunitetit evropian për vendin tonë, po ashtu krijon bindjen se angazhimi, vullneti dhe përkushtimi që klasa politike shqiptare pritet të dëshmojë, do të ndikojnë pozitivisht procesin e marrjes së statusit të vendit kandidat nga Shqipëria.

Presidenti Topi vlerësoi se “pas dy vjetësh ngërçi politik, perspektiva evropiane ka treguar se është një mjet bashkimi dhe tejet i rëndësishëm për ndërtimin e konsensusit ndërmjet klasës politike në vend”.

Presidenti i Republikës vlerësoi se ngritja e Komisionit “ad hoc” për Reformën Zgjedhore dhe Grupit të Punës për rishikimin e rregullave të Kuvendit, si dhe votimi në Komisionet parlamentare të disa kodeve që kërkojnë shumicë të cilësuar, shënojnë zhvillime pozitive që i hapin rrugën zbatimit të 12 përparësive të Komisionit Evropian”, – ndërsa theksoi faktin se Raporti i Progresit i Komisionit Evropian është kthyer në një program pune për institucionet shqiptare, për të avancuar më tej agjendën evropiane.

 Kukan: Keni hedhur hapa inkurajues

Kryetarja e Kuvendit, Jozefina Topalli priti gjatë paraditës së enjtes delegacionin e Parlamentit Europian, të kryesur nga Eduart Kukan, të cilët ndodhen në Shqipëri për Takimin e rradhës BE-Shqipëri, të Komitetit Parlamentar për Stabilizim-Asociimin.

“Jemi shumë të lumtur që po vijnë lajme shumë pozitive nga Shqipëria. Arritja e marrëveshjeve dhe votimi i tre ligjeve me 3/5 janë hapa inkurajues dhe konkrete. Shpresojmë të vijohet në këtë klimë, në përmbushje të aspiratës integruese. Mesazhi i takimit tonë me ju është se  Parlamenti Europian mirëpret marrëveshjet e arritura mes partive politike. Jemi të lumtur që këto marrëveshje u arritën në Parlament. Ne vlerësojmë kontributin tuaj, si Kryetare e Parlamentit, rolin tuaj pozitiv dhe duam të besojmë se kjo klimë do të vijojë.Kemi ardhur këtu t’ju rikonfirmojmë se në Parlamentit Europian gjërat po lëvizin pozitivisht për Shqipërinë dhe jemi të gatshëm të kontribojmë që kjo atmosferë të vijojë në këtë trend pozitiv”, tha Kukan.

Prova e dytë e një pakti

Mëngjesin e së premtes statusi i vendit kandidat dhe një sëre cështjesh të tjera do të vendosin përballë njëri tjetrit politikanët shqiptarë dhe ata të BE-së në takimin e katërt ndërparlamentar për stabilizim-asocimin mes Shqipërisë dhe BE-së.

Ky takim pritet me interes në qarqet e politikës shqiptare gjithashtu edhe ato të Brukselit nëse do të arrihet apo jo, miratimi i një marrëveshjeje te perbashket.

Në tre takimet e mëparshme per stabilizim-asocimin mes Shqipërisë dhe BE-së nuk janë miratuar marrëveshje të cilat në vetvete ishin një angazhim i palëve në përmbushjen e prioriteve të BE vendosura Shqipërisë.

Tre marrëveshjet e dështuara u kthyen në precedent për parlamentin Europian ku politikbërësit e një shteti nuk mundin të bien dakort për cështje me rendesi jetike per projektet integruese të vëndit të tyre.Edhe në mbledhjen e nesërme priten debate për tekstin e marrveshjes mes anëtarëve të opozitës dhe mazhorancës.

Por presioni i vazhdueshëm i komunitetit ndërkombëtar muajt e fundit për dialog duket se do të luajë një rol kyc që palët me vështirësi të gjejnë një të mesme të artë në miratimin e marrëveshjes.

Megjithatë gjithcka mbetet e hapur pasi politikës shqiptare nuk i mungojnë suprizat e minutës së fundit. Një gjë është e sigurtë europarlamentarët mest tyre edhe Tanja Fajon nuk presin një zhgënjim të katërt nga politikanët shqiptarë. Ndërkohë Top Channel nga burime pranë eurodeputetëve ka mësuar se palët kanë shprehur gadishmëri në miratimin e marrëveshjes. Pakti i pare per reformen zgjedhore eshte nje ogur i mire.

Top Channel