Betonohet ura mbi lumin Ibër

Ngjarja ka ndodhur mbrëmjen e së shtunës pas ndeshjes ndërmjet Serbisë dhe Turqisë, e vlefshme për gjysmëfinalen e Kampionatit Europian në volejboll.

Lajmin e ka konfirmuar edhe zëdhënësi i Policisë për rajonine Mitrovicës, Besim Hoti, që sipas tij përmes një përziersi të betonit është bërë përforcimi i barrikadës.

Tashmë disa serbë vazhdimisht bëjnë roje te barrikada kryesore që lidh veriun dhe jugun e Mitrovicës, ndërsa shpeshherë afër saj serbët luajnë edhe futboll.

Po ashtu, barrikadat e vendosura në pjesë të tjera të veriut, vazhdojnë të mbajnë të bllokuara rrugët që çojnë në pikat kufitare veriore 1 e 31, kurse bartja e doganierëve të Kosovës për në Bërnjak dhe Jarinjë vazhdon të bëhet nga ajri.

Vetëm pak kohë pasi KFOR-i kishte hapur për qarkullim pikën në Jarinjë, qarkullimi i automjeteve është ndërprerë pasi serbët kanë ngritur një tjetër barrikadë, kësaj radhe nga ana e Serbisë, duke bërë që përherë të parë barrikadat të ngrihen edhe jashtë territorit të Kosovës.

Raportohet se është shtuar numri i ushtarëve gjermanë në Jarinjë, ndërsa me helikopterë janë sjellë mjete për largim të barrikadave.

Në anën tjetër, Oliver Ivanovic, sekretar për Kosovën në Qeverinë e Serbisë, i ka kërkuar komandantit të ri të KFOR-it, Erhard Dreus që të pranojë bisedimet me përfaqësuesit e serbëve për zgjidhjen e kësaj çështjeje. Sipas tij, këto janë kërkesa modeste, por nëse nuk përmbushen atëherë serbët e Veriut nuk do të pranojnë t’i heqin barrikadat.

Ndërsa, disa ditë më parë zëvëndëskryeminstri i Qeverisë së Kosovës Hajredin Kuçi ka deklaruar se “durimit tonë do t’i vijë fundi”.

Top Channel