Cana, titullar në rolin natyral

Në sfidën ndaj Palermos këtë javë, treshja fillestare e mesfushës e formuar nga Ledezma, Matuzalem dhe Cana ishte shumë statike. Pritej më shumë nga mesfushori shqiptar, por gjithashtu është e vërtetë që ish-futbollisti i Gallatasarait ka një strukturë fizike të rëndë dhe për shkak të dëmtimeve i është dashur të stërvitet dyfish, për të arritur shokët e skuadrës nga pikëpamja e formës. Cana ka nevojë për më shumë minuta lojë për të kapur ritmin e ndeshjeve dhe mbi të gjitha, për t’u adaptuar në sistemin e ri të lojës, ku ai aktivizohet në krah të mesfushës. Gjithsesi Lacio sot do të luajë me Sportingun e Lisbonës në kryeqytetin portugez, në një ndeshje të vlefshme për grupin D të Europa League. Nuk bëhet fjalë për një sfidë të lehtë për bardhekaltrit italianë. Kështu që trajneri Edi Reja ka grumbulluar në skuadër lojtarët më në formë, por duke i krijuar vend në formacionin e parë edhe Lorikut. Sikurse kanë bërë të ditur mediat italiane, mesfushori i Kombëtares kuqezi do të aplikojë një lloj “turnover”: për shembull Cana do të luajë në rolin e tij si mesfushor qendre në vend të Kristian Ledesmas, i cili duket se ka nevojë për pushim. Në mesfushë do të luajë edhe Alvaro Gonzalez (në krahun e majtë) dhe Kristian Broki (në të majtë). Në mesfushë do të mungojë edhe Matuzalem, i cili rezulton me një dëmtim muskular. Moduli i përzgjedhur nga trajneri Reja do të jetë 4-3-1-2 me Hernanes pas dy sulmuesve Klose dhe Cisse. Për shqiptari është një rast i rëndësishëm, pasi mbi të gjitha do të luajë në rolin e preferuar, atë të shkatërruesit përpara mbrojtjes.

Top Channel