Kombëtarja shqiptare e Shpresave ka mundur me rezultatin 4-3 kombëtaren U-21 të Moldavisë, në ndeshjen e vlefshme për eliminatoret e Euro 2013 të 21-vjeçarëve.
Të shtatë golat e takimit që u zhvillua në stadiumin e Korçës u shënuan në pjesën e dytë.
Ionita kaloi në avantazh moldavët në minutën e 54, por 5 minuta më pas është Sadiku ai që barazoi shifrat në 1-1.
Ionita sërish i dha avantazhin miqve në minutën e 61 pasi shndërroi në gol një 11-metërsh të akorduar nga arbitri skocez i ndeshjes.
Shpresat tona kundërpërgjigjen dhe brenda 5 minutash (75’, 79’ dhe 80’) përmbysin rezultatin me golat e Brahimit, Telushit dhe sërish Sadikut, duke i çuar shifrat në 4-2.
Në minutën e 89’ Ginsari ngushton sërish diferencën, por nuk ka më kohë dhe Shqipëria e 21-vjeçarëve merr tre pikët e para në grupin e saj pas 2 ndeshjesh të zhvilluara.
Shpresat gjenden në grupin 6 të eleminatoreve së bashku me Rusinë, Portugalinë, Poloninë dhe Moldavinë. Pas dy ndeshjesh të zhvilluara Shqipëria ka 3 pikë, po aq sa edhe Rusia, Portugalia dhe Polonia, por rusët dhe portugezët kanë luajtur vetëm një ndeshje.
Moldavia renditet e fundit me 0 pikë në 2 ndeshje.
Top Channel
