Kuzhe, realist përballë Francës

“Nuk mund të pretendojmë që ndaj Francës të kemi një dominim të lojës dhe presim që ata të mbajnë topin më shumë se ne. Por kjo nuk do të thotë që ne vetëm do të mbrohemi, ne do të mundohemi ta kapim në kundërsulm. Vendosja e Currit në mesfushë është një frymëmarrje për ne, pasi ai është agresiv, mund të futet në duel dhe mund të rrezikojë në zonën kundërshtare me topat e lartë. Kjo zgjedhje është edhe për shkak të formës së mirë që po kalon Teli”, shprehet Kuzhe.

Kapiteni Altin Lala, i cili ende nuk e ka të sigurtë vendin në formacionin e parë, thotë se përballë një kundërshtari kaq të fortë duhet ruajtur gjakftohtësia: “Shpresojmë që të jemi në gjendjen më optimale. Duhet gjakftohtësi sepse Franca ka lojtarë shumë të mirë në sulm.

“Francezët janë në vendin e parë dhe kanë presionin për të siguruar këtë vend duke fituar ndaj nesh dhe Rumanisë. Ne duhet të jemi të bashkuar dhe publiku duhet të na mbështesë”, deklaron Cana.

Përballë futbollistëve të drejtuar nga Lorent Blank, trajneri i kombëtares shqiptare do të nxjerrë në fushë një formacion me dy sulmues, si gjithmonë dyshja Salihi – Bogdani.

Policia bllokon koreografinë e Tifozave Kuq e Zi

Tifozët Kuq e Zi deklaruan se Policia e Tiranës u ka bllokuar koreografinë e përgatitur për ndeshjen e kombetarës shqiptare ndaj asaj franceze që luhet të premten në mbrëmje.

Ata thonë se ditën e ndeshjes do të regjistrohet videoklipi i këngës së Tifozave dhe pamjet filmike janë shumë të rëndesishme për ta pasi do të jenë rreth 1000 vetë në stadium.

“Por pa asnjë shpjegim nga ana e Policisë së Shtetit, kjo koreografi po bllokohet që të hapet në stadium”, njoftojnë Tifozet.

Grupimi “Tifozat Kuq e Zi”, i themeluar në dhjetor të 2003, ka qenë gjithmonë pararojë e tifozerisë shqiptare, me koreografi, himn dhe përkrahje në mënyre masive të kombëtares tonë.

Policia e kryeqytetit bëri të ditur se do të ushtrohet kontroll i imtësishëm i tifozëve që do të hyjnë në stadium.

“Qemal Stafa” gati për Francën

Stadiumi kombëtar “Qemal Stafa” do të jetë gati për sfidën e të premtes. Drejtori i këtij impianti, Viron Bezhani ka pohuar se falë bashkëpunimit me FSHF-në, me Drejtorinë e Ujësjellsave dhe me Drejtorinë e Policisë, fushat dhe ambientet e tjera kanë ndryshuar pamje.

“Mendoj se i kemi marrë të gjitha masat. E kemi lyer të gjithë stadiumin”, tha Bezhani.

“Nuk besoj se kjo do të jetë ndeshja e fundit. Do të përgatitemi edhe për ndeshjen me Rumaninë”, theksoi ai.

 

Top Channel