BE: Situata në Tiranë, shqetësuese

“BE ndoqi nga afër zgjedhjet lokale 2011 dhe shënon se, përgjithësisht ato u mbajtën në mënyrë transparente e konkurruese, megjithë vështirësitë proceduriale. Sidoqoftë, situata në Tiranë është një cështje shqetësuese. BE shpreh keqardhje për keqësimin e situatës politike dhe rritjes së tensioneve që pasuan zgjedhjet dhe zhvillimin e procesit”, thuhet në deklaratë.

Ashtu si në qëndrimet e deritanishme të zyrtarëve të Komisionit, Këshilli i ministrave të Jashtëm bën thirrje për finalizim të qetë e të pavarur të procesit zgjedhor, duke u kërkuar partive politike që të njohin e respektojnë sundimin e ligjit.

“BE, ndërsa shënon vendimet e Kolegjit Zgjedhor, nënvizon se është thelbësore që procesi elektoral të mbyllet në transparencë, në pavarësi e në përputhje të plotë me kuadrin ligjor, duke përfshirë këtu edhe procedurën e ankesave dhe shpalljen e rezultateve përfundimtare nga KQZ. Është po ashtu thelbesore që të gjitha partitë të njohin epërsinë e sundimit të ligjit mbi cdo lloj interesi tjetër. BE bën thirrje ndaj të gjithë udhëheqësve politikë që të mbështesin finalizimin e qetë të procesit zgjedhor, me konstruktivitet dhe me një fokus në të ardhmen europiane të vendit. BE do të ndjekë nga afër vlerësimin e procesit nga misioni vëzhgues zgjedhor OSBE/ODIHR”, nënvizohet në deklaratën përmbyllëse.

Megjithë ndryshimet e bëra deri më sot në ligjin elektoral, BE vlerëson se Shqipërisë i duhet një reformë e plotë zgjedhore, ku duhen përfshirë të gjitha rekomandimet e bëra nga OSBE/ODIHR në katër vitet e fundit.

“BE i kërkon qeverisë dhe opozitës që, në bashkëpunim me shoqërinë civile të bien dakord për një reformë të plotë zgjedhore, duke trajtuar të gjitha rekomandimet e OSBE/ODIHR në 2007, 2009 dhe 2011 përpara se të deklarohen zgjedhjet e ardhshme. BE vë në dukje synimin e sekretarit të përgjithshëm të Këshillit të Evropës për të pyetur Komisionin e Venecias për një mendim sesi të shmangen situata të ngjashme në zgjedhjet e ardhshme”, vlerëson BE.

Në përfundimet e tyre mbi Shqipërinë, ministrat e Jashtëm të BE-së shprehen qartë se vendi do të mund të avancojë drejt Unionit vetëm pas përmbushjes së të gjitha kushteve të kërkuara, mes të cilave dhe bën pjesë dhe vendosja e një dialogu politik.

“BE i bën thirrje qeverisë dhe opozitës për të vendosur urgjentisht dialogun dhe për të kapërcyer ngërcin e gjatë politik. Një dialog i tillë është i domosdoshëm për funksionimin normal të një shoqërie demokratike  dhe institucionet e saj, duke përfshirë dhe funksionimin e Parlamentit, si dhe avancimin e integrimit europian të vendit. BE i kërkon autoriteteve shqiptare që të ripërtërijnë dhe të forcojnë përpjekjet e tyre mbi axhendën e reformave dhe zbatimin e tyre. Këto janë thelbësore për të arritur shkallën e nevojshme të pajtueshmërisë me kriteret e Kopenghagenit, duke përfshirë këtu dhe 12 prioritetet kyce që identifikoi Komisioni Europian më 9 nëntor 2010 në Opinionin mbi kandidaturën e Shqipërisë. Vetëm pas përmbushjes së këtyre të mësipërme, Shqipëria do të jetë në gjendje për të ecur përpara drejt BE-së, në përputhje me konkluzionet e Këshillit të Dhjetorit 2010”.

Në Dhjetor 2010, Këshilli i BE-së u angazhua për pranimin e kandidaturës së Shqipërisë, sapo vendi të përmbushte 12 prioritetet kyce që përcaktoi Komisioni Europian në opinionin përkatës.

Deri më sot, gjykohet se Shqipëria nuk ka përparuar në asnjë prej tyre, e madje, burime konfidenciale nga ky takim rrëfyen për TCH se vendit pritet t’i jepen kushte shtesë në raportin e progresit të tetorit.

Përgatiti: Arta Tozaj

Top Channel