Kryetari i Partisë Socialiste, Edi Rama ishte në Spitalin Ushtarak ku vizitoi të riun që u plagos me thikë një ditë më parë në prag të takimit elektoral të Partisë Socialiste.
I riu u plagos nga një i ri tjetër kur turma e njerëzve që do të merrte pjesë në takimin e kryetarit Rama, kaloi përpara zyrës elektorale të LSI-së.
Kjo parti u distancua menjëherë nga autori i plagosjes, kurse policia e cilësoi ngjarjen si pasojë e një zënke banale.
Edi Rama tha se këto akte nuk e trembin Partinë Socialiste, e cila në zgjedhjet e ardhshme do të dijë ta mbrojë votën e saj.
“Për ministrin e Brendshëm në detyrë është korniza më kuptimplotë e këtyre ndodhive, e shumë ndodhive të tjera dhe e të tjera gjërave aspak ogurmira, që zhvillohen nën rrogozin e këtij regjimi kusarësh dhe matrapazësh. Ne, jo vetëm që jemi të vendosur të përballemi sy më sy dhe dhëmbë për dhëmbë me këtë regjim, por e sigurojmë Ilirin dhe Saliun se në 8 maj ajo që ata do të fitojnë do të jetë vetëm me votë dhe askund tjetër nuk do të mund të fitojnë gjësend tjetër me dhunë”, deklaroi Rama.
Top Channel
