Piloti brazilian, Gustavo Sondermann, ndërroi sot jetë pas një aksidenti vdekjeprurës gjatë provave në pistën e Interlagosit, në kategorinë shumë popullore të automobilizmit në Brazil, Kupa Montana.
”Përballë dëmtimeve me të cilat Sondermann u paraqit në spital, mjekët vendosën se një ndërhyrje kirurgjikale është e padobishme, pasi dëmi në trurin e tij është i pakthyeshëm”, deklaroi një zëdhënës i spitalit ku ai u dërgua me urgjencë në Sao Paulo.
Ndonëse piloti ende merr frymë, vdekja e trurit do të thotë se ai nuk do të jetë më kurrë në gjendje të rikuperohet dhe familja ka lajmëruar se nuk ka ndërmend të zgjasë vuajtjet e tij.
Zemra e Sondermann-it do të pushojë së rrahuri pasi miq, të afërm e kolegë t’a përshëndesin për herë të fundit, përpara se të shkëputet prej aparaturave që e mbajnë në jetë.
Aksidenti ndodhi me shpejtësi të lartë, pasi Sondermann-i humbi kontrollin e makinës, mbase për një defekt teknik apo si pasojë e shiut të dendur. Ai qëndroi disa minuta pa oksigjen dhe kjo shkaktoi ndalimin e të gjitha funksioneve të trurit.
Vendi ku ai u përplas quhet “kthesa e kafesë” dhe u bë e njohur në vitin 2007 për një aksident të frikshëm të Alonsos në Formula 1. Webber e Rosberg kanë pësuar gjithashtu aksidente në këtë kthesë të rrezikshme në garën e Çmimit të Madh të Brazilit.
Top Channel
