Autoritetet italiane bënë të ditur gjatë drekës se kanë vendosur të njohin zyrtarisht rebelët në Libi, ndërsa qeveria e tyre e improvizuar është e vetmja me të cilën Roma do të bisedojë në të ardhmen.
Ministri i Jashtëm i vendit, Franco Frattini, deklaroi se vendi i tij “do t’i bashkohet Francës dhe Katarit, të cilat kanë hequr njohjen ndërkombëtare ndaj Gaddafi-t, për t’i dhënë një sinjal mbështetje miliona libianëve që kërkojnë të jetojnë në një vend demokratik”.
Italia ka qenë aleatja më e ngushtë e Gaddafi-t përpara fillimit të luftimeve, por sipas Romës zyrtare, garancitë e paraqitura nga një i dërguar i kolonelit për të zgjidhur krizën në Libi nuk ishin të besueshme.
Duke folur nga Roma, Ministri i Jashtëm i Qeverisë Libiane të Tranzicionit, Ali al-Essawi, falenderoi Italinë “për mbështetjen ndaj revolucionit”, në të njëjtën kohë që e konsideroi si të papranueshme ofertën e një qeverie tranzicioni të drejtuar nga një prej djemve të Gaddafi-t.
Top Channel
