![](https://top-channel.tv/wp-content/uploads/2024/06/f_sd-1-800x450.jpg)
Mesfushori i Bayern Munchen, Arjen Robben është i sigurt se me rikthimin e tij në fushë, paraqitjet e skuadrës do të arrijnë nivelin e shpresuar.
Gjigantët gjermanë kanë lënë shumë për të dëshiruar në fazën e parë të Bundesligës dhe e shohin veten 14 pikë pas kryesuesve të Dortmund-it, por për holandezin, titulli kampion mund të vazhdojë të jetë i fitueshëm.
”Paraqitja e deritanishme e Borussia-s ka qenë e jashtëzakonshme dhe diferenca e madhe në renditje është e merituar. Megjithatë, në futboll gjithçka mund të ndodh. Ne do të japim më të mirën tonë dhe me pak fat, do të krijojmë një vazhdimësi fitoresh që mund të na nxjerrin në vendin e parë”, deklaroi Robben në faqen zyrtare të klubit.
26-vjeçari u dëmtua rëndë në finalen e humbur të Botërorit, përballë Spanjës, por tani është në prag të rikthimit në fushë për herë të parë pas pothuajse gjashtë muajsh.
Lojtari ka nisur të stërvitet rregullisht me shokët e tij të skuadrës dhe do të jetë në gjendje të luajë që në ndeshjen e parë të skuadrës në janar, kundër Wolfsburg-ut.
”Ndihem shumë mirë për momentin dhe pres me padurim të nis sezonin tim në 15 janar. I mbetet trajnerit që të vendosë se sa do të luaj, por ndihem shumë i kënaqur që më në fund jam sërish pjesë e skuadrës”.
Top Channel