2010, 105 gazetarë të vrarë

105 reporterë në 33 vende kanë humbur jetën gjatë ushtrimit të profesionit në vitin që po lëmë pas.

Kërkimet e organizatës së pavarur joqeveritare Press Emblem Campaign, evidentojnë Meksikën dhe Pakistanin si zonat me rrezikshmëri më të lartë.

Në Meksikë zien një luftë e përgjakshme antidrogë dhe në Pakistan, rajonet e paqëta kufitare me Afganistanin rezultuan si kurthe vdekjeprurëse.

Krahasuar me 2009-tën, kur bilanci i këtyre vdekjeve shënonte 122, shifra aktuale e viktimave tregon vërtet rënie, por nga ana tjetër ajo është më e lartë se 91 jetët e humbura në 2008-tën.

Nëntë gazetarë të vrarë pati në Honduras, tetë ishin që prej fillimit të 2010-ës në Irak, gjashtë në Filipine, pesë në Rusi dhe katër në Kolumbi.

Në Somali, Indonezi dhe në Nepal humbën jetën në krye të detyrës 3 gazetarë.

Në linja të përgjithshme, Amerika Latine konsiderohet këtë vit rajoni më i rrezikshëm për gazetarët: aty u vranë plot 35 reporterë.

Pason Azia me 33 përfaqësues të medias të vrarë dhe e treta vjen Afrika me 14.

Në Evropë u numëruan 12 viktima në vende si Bullgaria, Qiproja, Greqia dhe Ukraina.

Sekretari i përgjithshëm i organizatës me seli në Gjenevë, Blaise Lempen, edhe ai vetë reporter, tha se vrasja e gazetarëve po shndërrohet në një epidemi që s`gjen shërim dhe shtoi se komuniteti ndërkombëtar nuk ka arritur të krijojë mekanizma efikase për nxjerrjen e personave përgjegjës në bankën e drejtësisë.

Top Channel