Pakistan, të paktën 40 të vrarë

Shpërthimi ndodhi në qytetin e quajtur Khar në krahinën e Bajaur, shumë pranë kufirit me Afganistanin, ku janë të vendosura dhe strukturat fisnore që mbështesin Al-Qaeda.

Pothuajse 1 000 persona, të zhvendosur nga luftimet, ishin duke marrë ndihmë në këtë qendër. 50 të tjerë u plagosën, disa prej të cilëve rëndë, prandaj numri i viktimave mund të rritet.

Shpërthimi i këtij mëngjesi është i fundit në një seri sulmesh që ka tronditur këtë rajon të Pakistanit kohët e fundit. Asnjë grup nuk ka marrë ende përsipër përgjegjësinë e atentatit.

”Unë personalisht kam numëruar 40 trupa të pajetë, por shumë të tjerë janë në gjendje kritike”, deklaroi Dosti Rehman, një prej antarëve të Organizatës Botërore të Ushqimit, për agjensinë e lajmeve “Reuters”.

Të gjithë viktimat besohet të jenë civilë, të cilët kishin braktisur shtëpitë e tyre si rrjedhojë e luftimeve midis forcave të Al-Qaeda dhe ushtrisë paksitaneze. Zona e Bajaurit, vetëm përpara pak javësh ishte deklaruar si e qetë pas ofensivave të suksesshme të trupave qeveritare. Një ditë më parë, 24 militantë dhe 11 ushtarë humbën jetën në rajonin e Mohmandit, i ndodhur shumë pranë.

Top Channel