Ndryshe nga Shqiperia, Komisioni vlerëson se në Mal të Zi ka një konsensus të fortë mes partive politike për ndërtimin e shtetit dhe integrimin europian. Demokracia parlamentare e vendit përputhet tërësisht me parimet europiane dhe zgjedhjet përmbushen shumicën e standarteve ndërkombëtare.
Por, për kriterin politik të Kopenhagenit, në opinionin e tij mbi kandidaturën e Malit të Zi, Komisioni vëren disa parregullësi në funksionimin e institucioneve demokratike dhe zbatimin e legjislacionit.
Ndarja e pushteteve nuk respektohet në rastin e gjyqësorit, ndërsa administrata publike mbetet e dobët dhe gjërësisht e politizuar. Korrupsioni e krimi i organizuar konsiderohen probleme veçanërisht serioze. Trafiku i droges dhe pastrimi i parave paraqiten si shqetësime. Media e shoqëria civile mbeten subjekt presionesh nga administrata e politika.
Për kriterin ekonomik, Komisioni thotë se Mali i Zi ka shënuar qendrueshmëri makroekonomike, rritje mbi 5%, ka ulur papunësinë, defiçiti buxhetor e borxhi publik janë ruajtur në nivelet e duhura. Klima ndaj biznesit është përmirësuar dhe është bërë atraktive për investimet e huaja. Shkëmbimet tregtare me BE-në dhe rajonin vlerësohen të larta.
Por, Mali i zi vlerësohet se ndryshe nga Shqipëria është prekur nga kriza botërore, veçanërisht në mbikqyrjen e sektorit bankar. Infrastruktura në energji e transport mbetet e pamjaftueshme, dhe sektori informal vlerësohet sfidë e rëndësishme për vendin.
Kriteri i tretë i Kopenhagenit, ai mbi përputhjen e legjislacionit vendas me atë europian, vlerësohet pa ndryshime thelbësore, me të njëjtat nota si në opinionin mbi Shqipërinë.
Edhe në këtë rast, konkluzioni i Komisionit nëse vendi meriton statusin kandidat dhe çeljen e negociatave mbetet për t’u vendosur në mbledhjen e Kolegjit të Komisionerëve.
Në përgjithësi për reston e vendeve të rajonit, Paketa e Zgjerimit vlerëson se reformat në Ballkan janë ngadalësuar. Vendet e rajonit duhet të fokusohen në mirëqeverisje, të përmirësojnë shtetin ligjor, të shpejtojnë reformat ekonomike dhe të përshtasin legjislacionin me atë europian.
Përmendet se në disa vende vazhdon fenomeni i kërcënimit dhe goditjes fizike ndaj gazetarëve dhe se ndërhyrjet politike, apo gjobat e larta joproporcionale, dëmtojnë pavarësinë e medias. Bashkpunimi i plotë me Gjykatën e Hagës mbetet kërkesë e vazhdueshme në raportet vjetore për Kroacine, Bosnjen e Serbinë.
Çështjet e hapura bilaterale për statusin e Kosovës pengojnë bashkëpunimin rajonal, sipas Komisionit. Mosmarrëveshjet mes fqinjëve nuk duhet të shtrohen në tryezë kur bëhet fjalë për anëtarësimin e tyre, sugjeron Komisioni.
Në raport flitet për nisjen e negociatave mbi heqjen e regjimit të vizave për kosovarët, meqenëse autoritetet vendase janë angazhuar vetë për riatdhesimin e qytetarëve. Për kriterin ekonomik, Kosova vlerësohet se nuk është dëmtuar nga kriza globale, falë varësisë së ulët të tregut nga eksportet.
Serbia konsiderohet nga Komisioni si shteti me i demtuar nga kjo krize. Ne raport, Komisioni njeh aplikimin e vendit per statusin kandidat, por nenvizon ndaj Beogradit rendesine e vendosjes se mardhenieve te mira me Prishtinen. Ne kete kuader, Komisioni i ben thirrje autoriteteve serbe te njohin vulat doganore kosovare dhe te forcojne bashkpunimin me misionin EULEX.
Ne Bosnje-Hercegovine, Komisioni cmon progres te limituar, dhe nje sere problemesh komplekse lidhur me kriterin politik te Kopenhagenit. Impakti i krizes financiare boterore ne kete vend vleresohet i ndjeshem.
Për Maqedoninë, raporti vjetor i Komisionit konfirmon ruajtjen e rekomandimit për çeljen e negociatave për anëtaresim, por veçon si të papërmbushura për kriterin politik, pavarësinë e gjyqësorit, reformën në administratë, lirinë e shprehjes, përforcimin e dialogut politik, zbatimin e plotë të Marrëveshjes së Ohrit. Korrupsioni vlerësohet si “mbizotërues dhe një problem serioz”. Kërkohet zgjidhje për çështjen e emrit me Greqinë përmes bisedimeve që drejtohen nga OKB.
Në kriterin ekonomik, vlerësohet se është thelluar defiçiti fiskal, ka rritje të borxhit publik, papunësi të lartë, e përkeqësim të cilësisë së shpenzimeve publike.
Ndërsa Kroacia vlerësohet se i përmbush kriteret e Kopenhagenit për të qenë anëtare e plotë në BE. Të vetmet pengesa, sipas Komisionit, vinë nga parregullësitë e gjyqësorit dhe çështjet e konkurencës.
Top Channel
