Juristët: “Beqja”, votimi nul

Më 21 tetor të vitit 2009, Gjykata Kushtetuese bëri interpretimin e nenit 78.1 të Kushtetutës. Që thotë se përveç rasteve kur Kushtetuta parashikon një shumicë të cilësuar, normalisht Kuvendi vendos me shumicën e votave, në prani të më shumë se gjysmës së të gjithë anëtarëve të tij.

Por si përcaktohet shumica e votave? Pas një arsyetimi të gjatë, si për çdo vendim që jep Gjykata Kushtetuese, në përfundim thuhet se “Vendimi i Kuvendit miratohet kur për të kanë votuar pro jo më pak se gjysma plus një e anëtarëve që janë të pranishëm”.

Luan Omari është jurist me eksperiencë. Për dy mandate rresht, nga viti ’98 deri në vitin 2006 ai ka qenë anëtar i Komisionit të Venecias dhe madje për një periudhë kohe, edhe një nga tre nënkryetarët e tij.

“Duhet gjysma + 1 e deputetëve. Nëse ka pasur të pranishëm 140 deputetë, do të duheshin 71 vota. Pra me 70 vendimi i është pavlefshëm dhe i pazbatueshëm”, deklaron jurisiti Luan Omari.

Ashtu sië duket edhe nga tabela elektronike e votimit, pavarësisht pretendimeve të socialistëve se deputeti Fatmir Toçi nuk mundi të votojë, në çdo rast duket se të pranishëm kanë qenë 140 deputetë. Në çdo rast, tani i mbetet Gjykatës Kushtetuese të vendosë nëse do ta pranojë për shqyrtim kërkesën e parlamentit për papajtueshmërinë e mandatit të deputetit Beqja, apo do të vlerësojë se kërkesa nuk ka marrë numrin e nevojshëm të votave në seancë plenare dhe nuk do të pranojë, për këtë arsye, që ta shqyrtojë. 

Top Channel