" /> ">
Nxënësit e klasës së shtatë në shkollën nëntë vjeçare “70 Vjetori i Pavarësisë” në qytezën e Poliçanit bojkotuan mësimin e së hënës në shenjë proteste kundër vendimit të Drejtorisë Arsimore për largimin nga puna të mësueses së tyre që denoncoi publikisht kolegun e saj për veprime të pahijshme.
Protestës së nxënësve iu bashkangjitën edhe prindërit e tyre, të cilët u shprehën se është larguar një nga mësueset më të mira të shkollës dhe se përkrahin kthimin e saj në detyrë.
“Po bëjmë protestë për të na rikthyer mësuesen, që e kanë përjashtuar për denoncimin që i bëri mësuesit të fiskulturës së djemve”, ka deklaruar një nxënëse.
Në mbrojtje të mësueses kanë dalë edhe deputeti socialist i këtij qarku Fidel Ylli, si edhe kryebashkiaku i Policanit.
“Ndërkohë që ne prisnim reagimin e ministrit, vazhdon shurdhëria e kësaj qeverie që mban drogaxhinjtë nëpër shkolla”, ka deklaruar Ylli.
Ndërkohë, drejtoresha e shkollës, Zeqine Hysi ka deklaruar se nuk ka asnjë mundësi për rikthimin e saj në detyrë, pasi shkarkimi është bërë nga Drejtoria Arsimore e Skraparit.
Top Channel