Në Lidhjen Demokratike të Kosovës po shtohen zërat kundër vazhdimit të aleancës qeverisëse me Partinë Demokratike të Kosovës.
Përveç Isa Mustafës pak kohë më parë, së fundmi është edhe deputeti i LDK-së, Fatmir Rexhepi që kërkon të dilet nga koalicioni me PDK-në.
“Kjo marrëveshje prej ditës kur është larguar Sejdiu, si nënshkrues i saj, për mendimin tim është jolegjitime”, ka deklaruar ai.
Sipas Rexhepit, deri në institucionet e reja, Kosova duhet të ketë një qeveri teknike. Por, deklarata e tij mbetet vetëm e tij, e jo edhe e LDK-së.
“Është e drejtë e zotit Rexhepi që të flasë në emër të vet, pra si deputet i Kuvendit të Kosovës. Nuk dëshiroj ta komentoj këtë deklaratë sepse për këtë çështje nuk vendos as Fatmir Rexhepi e as Ismet Beqiri, por për këtë çështje vendosin strukturat e partisë dhe tani për tani është kjo situate që është”, ka deklaruar Ismet Beqiri, shef i grupit parlamentar të LDK-së.
Ndërsa në anën tjetër, PDK vlerëson se koalicioni mund të vazhdojë të qëndrojë në fuqi derisa të mbahen zgjedhjet e reja.
“Deklaratat permanente të LDK-së deri më sot kanë qenë që koalicioni në qeveri vazhdon. Dhe ata bëjnë përgatitjet e tyre për Kuvendin dhe për çështjet e tyre të brendshme”, është shprehur anëtari i kryesisë së PDK-së, Xhavit Halili.
Në anën tjetër, ndonëse PDK dhe LDK do të mbajnë aleancën ndërmjet tyre deri në rezultatin e ri të zgjedhjeve të parakohshme parlamentare, këto parti vazhdojnë të kenë dallime për kohën se kur do të mbahen ato.
PDK mbështet fundin e janarit, apo fillimin e shkurtit, ndërsa në LDK thonë se zgjedhjet duhet të mbahen në marsin e 2011-ës.
Po ashtu, konsultimet për përcaktimin e datës së zgjedhjeve janë duke vazhduar. Të premten, ushtruesi i detyrës së presidentit, Jakup Krasniqi do të mbajë një takim të përbashkët me partitë parlamentare, ku sipas tij, pritet të qartësohet gjithçka në këtë drejtim.
Top Channel
