Banka e Shqipërisë i ka bërë për të disatën herë thirrje qeverisë që të mbajë nën kontroll shpenzimet për të mos rrezikuar borxhin publik.
“Duke ndjekur me vëmendje ecurinë aktuale dhe të pritshme ekonomike, si dhe duke vlerësuar me shqetësim implikimet e saj për treguesit fiskalë, Banka e Shqipërisë gjykon se politika fiskale duhet të bëjë kujdes për kontrollin e nivelit të deficitit buxhetor dhe të borxhit publik. Mbajtja e deficitit buxhetor në parametra të shëndetshëm do të rrisë besimin në qëndrueshmërinë afatgjatë të borxhit publik”, ka deklaruar guvernatori Ardian Fullani.
Banka e Shqipërisë vëren presion në treg nga qeveria për shkak të rritjes së kërkesës për borxh. Guvernatori Fullani tha se ritmi i lartë i huamarrjes së qeverisë ndikon direkt tek biznesi privat.
“Ulja e presionit në tregjet e brendshme financiare do të ndihmojë në kontrollin e normave afatgjata të interesit, duke lehtësuar aksesin e sektorit privat në tregun e kredisë. Banka e Shqipërisë mbetet e mendimit se huamarrja duhet të orientohet në tregjet jashtë, për t’i lënë hapësirën e nevojshme tregut shqiptar për kreditim”, ka nënvizuar Fullani.
Në deklaratën e sotme Këshilli Mbikëqyrës vendosi ta mbajë të pandryshuar normën e interesit. Pak kohë më parë, ministri i Financave Ridvan Bode kërkoi nga banka qëndore që të jetë më elastike në politikat e saj për të ulur kostot e kredive.
Top Channel
