Marçelo Lipi qëndron në krye të stolit së Italisë

Në të njëjtën kohë, do t’i jepet fund edhe spekulimeve rreth rikthimit të Lipit te Juventusi, në një post drejtuesi në klub. Gjithçka varej nga Çezare Prandeli: presidenti i Federatës Italiane (FIGC), Xhankarlo Abete hoqi dorë kur e kuptoi se Fiorentina do të bëjë të pamundurën për të mbajtur drejtuesin e stolit dhe se vetë teknikut i pëlqen më tepër ideja për t’u emëruar te Juve dhe jo në përfaqësuese.

Federata bëri një hap mbrapa dhe gjeti Lipin të gatshëm, për të nisur negociatat për rinovimin e kontratës. Presidenti i Fiorentinës, Diego Dela Vale, u shpreh qartë: “Në vezën e Pashkëve, tifozët tanë presin të gjejnë një letër ku Prandeli thotë se nuk do të shkojë te Juventusi”.

Deklaratë e fortë, e cila e “gozhdon” trajnerin (nën kontratë deri në vitin 2011) dhe rrezikon të prishë marrëdhënien e tij me tifozerinë, që gjatë këtyre viteve e ka pasur idhull, pavarësisht se ai është një ish-juventin. Firence nuk e ka harruar lehtësisht “tradhtinë” e Roberto Baxhos dhe për këtë arsye duket e udhës që zemërimi të mos përsëritet. Në situatën e krijuar, Abete vendos të mos bëjë asnjë lëvizje.

Korrektesë maksimale e numrit 1 të FIGC-it, i cili është edhe mik i Dela Vales. Të gjithë e dinë se federata dëshiron ta zëvendësojë Lipin me Prandelin pas Botërorit 2010: trajneri “vjollcë” është preferenca e parë, në një listë me pak emra. Por, një gjë mund të thuhet me siguri: fillimisht Prandeli duhet të “lirohet” nga marrëveshja aktuale, e vetëm më pas institucioni që drejton futbollin përtej Adriatikut mund t’i paraqesë ofertën për kontratë 2-vjeçare. Megjithatë, duhet marrë në konsideratë edhe interesimi i Juventusit.

Kandidatë të tjerë për pankinën “axurre” është vështirë të gjenden. Ançeloti dhe Kapelo mbeten një ëndërr, e mbi të gjitha kushtojnë shumë. Ranieri është i lidhur me Romën, të cilën po e kthen në krye të Serisë A, ndërsa Spaleti nuk shihet si njeriu ideal. FIGC kishte shqyrtuar edhe alternativat Dino Xof (ish-trajner i Kombëtares) dhe Alberto Zakeroni: por, i pari nuk mendon të rikthehet në stol, ndërsa i dyti u “dogj” me Juventusin. Për këto arsye, tashmë po kuotohet hipoteza e konfirmimit të Lipit, deri në Euro 2012 në Poloni dhe Ukrainë. Kontrata e re mund të firmoset në fund të majit, përpara nisjes drejt Afrikës së Jugut. Aty pritet të ketë një klauzolë që lidhet me prishjen e njëanshme, në bazë të rezultateve që Italia do të regjistrojë në Kupën e Botës.

Top Channel