Pas Champions League, pritet të përcaktohen skuadrat cerekfinaliste edhe të Europa League.
Sot do të zhvillohen ndeshjet e kthimit të 1/8-ave të finaleve ku enigmat ende nuk janë zgjidhur. Në Londër, Fulham do të presë Juventusin. Skuadra italiane vjen në këtë takim me një avantazh psikologjik pasi ka fituar ndeshjen e parë 3-1 dhe kalon mes 8 më të mirave edhe me një barazim. Liverpool do të presë në “Anfield Road” skuadrën e Lille.
“The Reds” e humbën takimin e parë në Francë 1-0, megjithatë kanë shanse për t’u kualifikuar për më tej. Mundësi për të kaluar më tej ka edhe Wolfsburg. Skuadra kampione e Gjermanisë do të presë në fushën e saj rusët e Rubin Kazan, ndaj të cilëve barazuan në ndeshjen e parë 1-1. I avantazhuar në ndeshjen e kthimit vjen edhe Hamburgu.
Skuadra gjermane do të udhëtojë drejt Belgjikës për t’u përballur me Anderlehtin me sigurinë e fitores 3-1 të shënuar përpara një jave. E vetmja skuadër që është pothuajse e kualifikuar është Standard Liege. Skuadra belge do të presë në fushën e saj grekët e Panathinaikos ndaj të cilëve fituan në ndeshjen e parë 3-1.Marseille-Benfica dhe Werder Bremen-Valencia janë të tjera sfida interesante në këtë ditë të Europa League.
Marseille dhe Werder duken në një avantazh të lehtë duke qenë se ndeshjet e para me kundërshtaret respektive i mbyllën me rezultatin e barabartë 1-1. Në Lisbone, Atletiko Madrid do të përballet me Sportingun. Ndeshja e parë përfundoi në barazimin 0-0 dhe skuadrës madrilene i mjafton cdo barazim me gola për të kaluar më tej.
Top Channel
