Sandërlend-Lion, nis beteja për Lorik Canën
16/01/2010 12:45
Aston Villa me sytë nga Serie A, synon argjentinasin e Juventusit 05/05 00:02
Sandërlendit i duhet të përballojë një betejë merkatoje të pazakontë në lidhje me Lorik Canën, teksa interesimi i francezëve të Lionit po rritet çdo ditë.
Ndërkombëtari shqiptar 26-vjeçar rezultoi një nga blerjet e shkëlqyera të trajnerit Stiv Bruse, që pagoi 5.8 milionë euro për ta marrë atë nga Olimpiku i Marsejës verën e kaluar.
Cana ka fituar një autoritet të padiskutueshëm te “Macet e zeza”, duke pronësuar edhe shiritin e kapitenit, por forma e tij e jashtëzakonshme nuk ka kaluar pa u vënë re në Francë, atje ku Lioni është në vijën e parë.
Trajneri Klod Pyel, sipas asaj që raporton “The Journal”, e ka vendosur mesfushorin shqiptar si prioritetin e tij, sidomos pas dështimit të tratativave me Patrik Vieira, tashmë te Mançester Siti, por sipas mediave britanike, trajneri Brus do të refuzojë çdo ofertë për kapitenin e tij.
Gjithsesi, vetë Cana nuk mendon aspak për zërat e merkatos, por është i fokusuar te ndeshja e kësaj jave në Premier League, ku i ka deklaruar sfidë Çelsit.
Top Channel
