Mbi 100 kontrata të lojtarëve të Bundesligës skadojnë në fund të këtij sezoni. Mes tyre është edhe ajo e mesfushorit të Kombëtares sonë, Altin Lala, i cili luan te skuadra e Hanoverit që nga viti 1998.
Kontrata aktuale e ish-kapitenit të skuadrës gjermane përfundon pikërisht në 30 qershorin e ardhshëm. Por sikurse kanë bërë të ditur dje gjermanët e “Spox”, në klubin e Hanoverit ekziston dëshira për ta mbajtur Altin Lalën për të paktën edhe një sezon tjetër. Oferta për rinovimin e kontratës së tij mendohet të jetë duke u përpiluar dhe shumë shpejt ajo pritet të bëhet zyrtare.
Firma e zezë mbi të bardhë do të hidhet vetëm pasi palët të kenë rënë dakord për të gjitha detajet e kontratës. Vlera aktuale e 33-vjeçarit shqiptar në tregun e futbollistëve është 1 milion e 200 mijë euro, bazuar në të dhënat e publikuar në faqen prestigjioze të transferimeve të lojtarëve “Transfermarkt.de”.
Lala që prej 10 vjetësh luan te Hanoveri dhe duket se karriera e tij do të vazhdojë në këtë ekip edhe sezonin e ardhshëm.
Top Channel
