Shqipëria-Portugali, rrezikohet ndeshja pa tifozë

Humbja e kuqezinjve të drejtuar nga Ari Han, përballë kundërshtarit direkt në grupin eliminator, nuk ka kaluar pa probleme në tribunat e mbushura (edhe prej çmimit të lirë të biletave).

Hedhja e sendeve të forta dhe shisheve në fushë mund të sjellë dënimin e fushës tonë, ku në vendimin e Komisionit të Disiplinës nuk përjashtohet vendimi për të luajtur sfidën e 6 qershorit me Portugalinë, me dyer të mbyllura. Në relacionin e delegatëve të “qeverisë” së futbollit botëror janë përmendur të gjitha  episodet, duke filluar nga tymëset në fillim të takimit, “lufta” në distancë me tifozët kundërshtarë dhe hedhja e sendeve në fushë.

Një relacion i është dërguar edhe Federatës Hungareze, ku përmendej reagimi i mbështetësve të saj, të cilët njihen si një prej tifozerive më problematike në kontinent. Për herë të fundit, përfaqësuesja ka luajtur pa tifozë në tribuna në vitin 2005, kur në eliminatoret e Botërorit 2006 fituan 3-2 me Gjeorgjinë.

“Qemal Stafa” rrezikoi të kyçej edhe në 17 nëntor 2007, për sfidën me Bjellorusinë, prej ndezjes së fishekzjarrëve dhe hedhjes së sendeve në fushë, në fund të ndeshjes Shqipëri-Holandë. Gjithsesi, FSHF e fitoi çështjen në Apel dhe u ndëshkua “vetëm” me 40 mijë euro gjobë.

Top Channel