Moti, dëbora shtyn tri ndeshje
21/03/2009 11:15
Befason Deshamps, grumbullon pas dy vjetësh mesfushorin e Al-Ittihadit 17/05 09:19
Shtyhen tri ndeshje të Kategorisë së Parë, të cilat ishin parashikuar për t’u luajtur sot, sipas programit të javës së 23-të.
Shkak për këtë është bërë pikërisht moti i keq që ka goditur Shqipërinë në 48 orët e fundit.
Dëbora e bardhë ka “pushtuar” jo vetëm zonat verilindore, por edhe ato juglindore, madje çrregullime të mëdha nga shirat e shumta kanë pësuar edhe qytetet e pjesës qendrore të vendit tonë. Sidoqoftë, përmbytjet e rrugëve në qytetet kryesore të vendit duket se nuk i kanë bërë të papërdorshme stadiumet.
Por më e rëndë paraqitet gjendja në aksin Pogradec-Ersekë, ku dëbora ka zbardhur fushat e futbollit. Në këtë pjesë të vendit ishte parashikuar që të luheshin tri ndeshje: Pogradeci-Naftëtari, Skënderbeu-Besëlidhja dhe Gramozi-Ada, të cilat me një vendim të FSHF-së janë shtyrë. Duke parë vështirësitë e mëdha edhe në akset rrugore të qyteteve në fjalë, FSHF-ja ka marrë vendimin për t’i shtyrë këto ndeshje në një datë tjetër, që do të vendoset në ditët në vazhdim.
Top Channel
