Skela, te Kotbus deri në vitin 2011

27/02/2009 10:45

Ervin Skela rinovon kontratën me Energie Kotbus. Pas bisedimeve të shumta me drejtuesit e klubit, mesfushori kuqezi gjeti gjuhën e përbashkët dhe do të luajë në këtë skuadër deri në vitin 2011.

Në fakt, marrëveshja e arritur mes palëve ndryshon nga pretendimet fillestare të 32-vjeçarit: Skela kërkonte të përfitonte 3 vjet kontratë, me synimin për të mbyllur karrierën në radhët e ekipit që lufton për mbijetesë në elitën e futbollit gjerman, madje ishte i gatshëm të luante aty edhe në Bundesligën II.

Gjithsesi, në fund ai firmosi vetëm për dy vjet dhe akordi prishet automatikisht nëse Kotbus bie nga kategoria. Vlonjati u bashkua me këtë skuadër në janar të vitit 2007, pas aventurës së dështuar tek Askoli në Serinë A italiane dhe prej atij momenti është shndërruar në një lojtar mjaft të rëndësishëm.

Në karrierën e tij, ai ka luajtur 157 ndeshje në Bundesligë,  ndërkohë që numëron 19 gola të realizuar: tetë prej të cilëve me fanellën e Kotbus, duke qenë vendimtar në mbijetesën e sezonit të kaluar.

 “Me rinovimin e kontratës, Energie Kotbus dhe Ervin Skela konfi rmuan dëshirën për të vazhduar bashkëpunimin edhe në të ardhmen. Të dyja palët kishin ambicie të njëjta dhe kjo i lehtësoi së tepërmi bisedimet”, deklaroi menaxheri i klubit, Shtefen Haidrish.

Top Channel