Hetim motrës së Lul Berishës
05/02/2017 00:00
Kandidatët për drejtues të prokurorive të Durrësit dhe Shkodrës, KLP nis procedurat për verifikimin e pasurisë së tyre 25/04 14:06
Në pritje të ballafaqimit të dëshmitarit të mbrojtur nga drejtësia Ylvi Beqaj me Emiliano Shullazin, që me gjasë pritet të ndodhë të hënën e kësaj jave, prokuroria ka zgjeruar hetimet dhe ka përfshirë në të edhe motrën e Lulzim Berishës, si pjesë e të njëjtës dosje hetimore.
Sipas dëshmitarit, ajo i premtoi ta ndihmojë për privatizimin e ish-hotel Vollgës për një shumë prej 500 mijë eurosh. Për këtë arsye, ajo i kërkoi që të bëjë një deklaratë noteriale sikur ia kishte borxh dhe që do ta shlyente pasi ajo ta kishte ndihmuar në këtë rast. Por, dëshmitari thotë se këto para’ nuk ia kishte, por kjo ishte një formë detyrimi për ndihmën që ajo do t’i jepte për privatizim.
Një deklaratë noteriale është prova kryesore në duart e Prokurorisë së Krimeve të Rënda, në të cilën thuhet se, Ylvi Beqaj i ka marrë shtetases Luljeta Berisha, motra e Lulzim Berishës, shumat prej 300 mijë markash në vitin 1998, 100 mijë dollarë në vitin 1994 dhe 150 mijë euro në vitin 2004. Nëse këto para’ nuk likujdoheshin brenda 2005-s, sipas një marrëveshjeje gojore, duhej paguar 1% e shumës në vit, për vonesat.
Kjo deklaratë është nënshkruar në gusht të vitit 2014 dhe i le kohë Beqajt ta shlyejë atë për tre muaj.
Prokuroria, pasi e sekuestroi provën materiale dhe mori deklaratën e dëshmitarit në fjalë, pritet ta thërrasë si person nën hetim Luljeta Berishën nën dyshimin e akuzës së pastrimit të parave. Berisha duhet t’i provojë prokurorisë burimin e të ardhurave të 500 mijë eurove.
Beqaj është dëshmitari kryesor ndaj bandës së Shullazit, ku tre anëtarët e tij, nën kërcënim dhe gjobëvënie i kanë marrë atij një shumë prej 550 mijë eurosh.
Top Channel
