Tërmet në Iran, qindra të vdekur

250 viktima janë konfirmuar deri tani e bilanci tragjik pritet të përkeqësohet, ndërsa lufta e ethshme për të nxjerrë të mbijetuar përshkallëzohet nga ora në orë.

Tërmetet me fuqi 6.4 dhe 6.3 të magnitudës rihter goditën në hapësirën midis Tabrizit dhe Aharit, në kufirin iraniano-iraken, në orët e vona të mbrëmjes së të shtunës.

Mbi 2 mijë persona besohet se kanë mbetur të plagosur dhe dhjetëra mijëra janë të pastrehë. Në total, u regjistruan edhe 55 lëkundje të tjera pas dy tronditjeve kryesore.

Shërbimet e urgjencës civile janë duke shpërndarë ushqime, ujë, medikamente dhe tenda, por komunikimi dhe energjia është ndërprerë në disa zona të goditura, duke e bërë më të vështirë evakuimin.

Sipas Televizionin Shtetëror Iranian, zona më e goditur ishte ajo pranë qyteteve Haris dhe Varzaqan, me mbi 110 fshatra ku numri i shtëpive të shembura është midis 50-80% të të gjithë banesave.

Presidenti Mahmoud Ahmadinejad, nëpërmjet një komunikate drejtuar kombit, shprehu ngushëllimet për të gjithë familjet e viktimave, ndërsa i kërkoi autoriteteve që të bëjnë gjithçka që kanë në dorë për të shpëtuar jetët e personave nën rrënoja dhe për të zbutur sa më shumë vuajtjet e të dëmtuarve.

Irani shtrihet në një vijë të rëndësishme gjeologjike, duke bërë që të jetë i ekspozuar nga aktiviteti sizmik. Në vitin 2003, një tërmet i fuqishëm goditi qytetin e Bamit, duke lënë 25 mijë të vdekur.

Top Channel