Ivanovic-serbëve: Jo referendumit

Në një intervistë për televizionin serb “TV Most”, Ivanovic ka deklaruar se referendumi nuk është i nevojshëm dhe ka theksuar se 95 për qind e banorëve të veriut nuk e dëshirojnë vartësinë nga institucionet e Prishtinës.

“Sigurisht që do të ketë ende sfida dhe ajo që është edhe më e sigurtë është se nuk kemi tjetër alternativë vec asaj të pushtetit serb”, ka theksuar Ivanovic.

Ai ka vlerësuar se komunikimi i serbëve të veriut me institucionet e Prishtinës është i vështirë dhe se qëndrimi i bashkësisë ndërkombëtare në këtë cështje ka qenë i njëanshëm.

“Ata që jetojnë në Kosovë, e në vecanti ata në veri, nuk duhet t’i lejojnë vetes lluksin që të ketë marrëdhënie të këqija me qeverinë e Serbisë”, ka shtuar zyrtari serb.

Të ashtuquajturit delegatë të kuvendeve komunale të veriut të Kosovës votuan vitin e kaluar për mbajtjen e referendumit në të cilin qytetarët serbë do të vendosin nëse duan t’i pranojnë ose jo institucionet e Kosovës.

Një lajm i tillë nuk u prit mirë nga Beogradi, e në vecanti nga vetë presidenti serb Boris Tadic, i cili kritikoi serbët e veriut duke thënë se referendumi vetëm sa do të rëndojë më tej situatën.

Gjithashtu, kundër referendumit janë shprehur edhe zyrtarë të tjerë serbë, të cilët sugjerojnë se e gjithë bota e di se serbët e Kosovës nuk do t’i pranojnë kurrë institucionet e Prishtinës.

Top Channel