Bisedimet, raundi i ri në janar

Sipas raportimeve të “RTK”, cështjet në fjalë do të jenë energjitika, telekomunikacioni dhe përfaqësimi i Kosovës në nismat rajonale e më gjerë.

Data e saktë e raundit të ri ende nuk dihet, por Prishtina dhe Beogradi zyrtar konfirmojnë se dialogu do i ndërmjetësuar nga Bashkimi Evropian do të vazhdojë.

Shefja e delegacionit kosovar, Edita Tahiri ka paralajmëruar edhe një takim në muajin shkurt, duke deklaruar se tani Serbia nuk mund të vendosë më kushte.

Në raundin e fundit të bisedimeve dy palët ranë dakord për nënshkrimin e marrëveshjes së lëvizjes së lirë, e cila nisi zbatimin në dhjetor.

Megjithatë, marrëveshja në fjalë u kritikua nga partitë opozitare në Kosovë, në vecanti nga lëvizja Vetëvendosje, e cila e cilësoi si një marrëveshje nënshtrimi.

Ndërsa udhëtarët dhe tregtarët e cilësuan atë si më të dëmshmen, si pasojë e kostos së lartë të shkaktuar nga taksat dhe detyrimet për pajisjen me targën e duhur.

Vetëvendosje akuzon qeverinë e Kosovës se në tetë raunde bisedimesh që ka zhvilluar deri tani me Serbinë ka lëshuar shumë pe, duke dëmtuar pavarësinë dhe sovranitetin e Kosovës.

“Secili nga tetë raundet e negociatave ka qenë një hap përpara për zhbërjen e shtetit të Kosovës”, thuhet në një deklaratë të lëvizjes Vetëvendosje, e cila mban titullin “8 dhuratat e Edita Tahirit për Kosovën”. 

Top Channel