Ka dhënë dorëheqjen kryeministri italian Silvio Berlusconi, pas një bisede të shkurtër të zhvilluar në presidencë me presidentin Giorgio Napolitano.
Në momentin e mbërritjes në Quirinale, Berlusconi u prit me vërshëllima nga shumë qytetarë të mbledhur, të cilët festonin për largimin e tij.
“Palaco”, “Jashtë mafia nga shteti”, bërtisnin të pranishmit, të cilët u përpoqën t’i afroheshin makinave të autokolonës.
Të tjerë vrapuan në drejtim të derës së presidencës, por u bllokuan nga agjentët e sigurisë, të cilët i kthyhen mbrapsht.
Ndërkohë, në zona të tjera të kryeqytetit italian ka tubime, si dhe koncerte të vogla për të shprehur gëzimin për dorëheqjen e kavalierit.
Dorëheqja e kryeministrit Berlusconi vjen pasi dhoma e ulët e Parlamentit italian miratoi pak orë më parë paketën e masave anti-krizë, të kërkuar nga BE dhe e projektuar për të ringjallur besimin e tregjeve tek ekonomia e Italisë.
Dorëheqja e Berlusconi-t i hap rrugën krijimit të një qeverie të përkohshme, që sipas të gjitha gjasave do të kryesohet nga ish-komisioneri i KE-së, Mario Monti.
Paketa e masave përfshin ngritje të taksave, ngritje të moshës së pensionit, të cmimit të karburanteve dhe të cmimit të aseteve të shtetit.
Anëtarët e dhomës së ulët votuan 380 pro kundrejt 26 jo, plus dy abstenime, pasi Senati aprovoi masat e paraqitura ditën e premte.
Tani, presidenti Napolitano mund t’i kërkojë zyrtarisht zotit Monti apo ndonjë kandidati tjetër që të formojë qeverinë e përkohshme.
“Ne e falenderojmë zotin Berlusconi për atë që ka bërë gjatë gjithë këtyre viteve”, deklaroi pas miratimit të paketës Fabrizio Cicchitto, deputet i partisë Populli i Lirisë. Ndërsa deputeti i opozitës Dario Franceschini mirëpriti dorëheqjen e kavalierit.
Situata e rëndë ekonomike në Itali bëri që disa ditë më parë e përjavshmja prestigjoze britanike “The Economist” të thumbonte Berlusconin.
Top Channel
