Top Show, Lugina e Harruar

Në studio ishin të ftuar përfaqësues dhe drejtues të pushtetit vendor e deputetë shqiptarë, si në Kuvendin e Kosovës, ashtu edhe në atë të Serbisë, të cilët nxorrën në pah problematikën e jetës në këtë territor të mbetur jashtë kufijve të Kosovës.

Ragmi Mustafa, kreu i Komunës së Preshevës dhe kryetar i Partisë Demokratike Shqiptare në Serbi, tha se shqiptarët në këtë pjesë ndodhen nën regjimin serb, të po atyre serbëve të cilët kryen gjenocid gjatë luftës. Ai tha se tashmë, Beogradi përdoru metoda më të sofistikuara për asimilimin e shqiptarëve.

“Kujtoj se tashmë politika serbe ka ndryshuar. Metodat e represionit ndaj shqiptarëve, nga metodat e dhunës me tyta automatiku, burgosje të montuara e dhunë, në këtë sistem metodat janë nga më të moderuarat. Këto metoda përdoren për të siguruar një pasiguri për qytetarët shqiptarë në Luginën e Preshevës dhe ajo pasiguri është në të gjitha sferat e jetës shoqërore dhe ekonomike. Në arsim, kulturë, qarkullim të lirë, zhvillimit ekonomik dhe në përdorimin e lirë të gjuhës, shkrimin shqip dhe përdorimin e simboleve kombëtare”, thotë zoti Mustafa.

Zoti Mustafa dhe qytetarë të tjerë shqiptarë të Luginës së Preshevës evidentuan si problem kryesor mungesën e librave për mësimin e gjuhës shqipe nëpër shkolla. Ata thanë se, në librat censuruar nga Beogradi janë hequr simbolet kombëtare shqiptare.

Ndërkohë, për rolin e Tiranës dhe Prishtinës për të mbrojtur popullsinë shqiptare të mbetur nën pushtetin serb, të ftuarit në studio thanë se si nga Shqipëria ashtu edhe nga Kosova nuk është luajtur një rol aktiv. Madje deputeti i Lëvizjes Vetëvendosje, Liburn Aliu, tha se Presheva, Medvegja dhe Bujanoci dhe të drejtat e shqiptarëve atje duhet të futen në dialog me Serbinë, ashtu sikundër Serbia kërkon të drejtat e serbëve në Kosovë.

Politologu Adri Nurellari nga ana e tij, tha se ajo që duhet të luajë një rol me agresiv në politikën e jashtme në mbrojtje të bashkëkombasve shqiptare në të gjithë Ballkanin është Tirana. Sipas tij, duhet të marrë fund politika e inferioritetit ndaj fqinjëve dhe të kërkohen të drejtat që u takojnë sipas konventave ndërkombëtare për shqiptarët në Serbi, Mal të Zi e Maqedoni. 

Top Channel