Presidenti i Kinës në Greqi/ Thellohen marrëdhëniet ekonomike

12/11/2019 06:46

Vizita dyditore e presidentit kinez Xhin Pin ka filluar me vendosjen e një kurore lulesh pranë monumentit të Ushtarit të Panjohur para parlamentit.

Pak më vonë ai është pritur nga homologu i tij grek Prokopis Pavlopoulos dhe në vazhdim nga kryeministri Kyriakos Mitsotakis i cili në konferencën e përbashkët ka theksuar rëndësinë e marrëdhënieve dypalëshe dhe sidomos atyre ekonomike, me finalizimin e zgjerimit të investimit gjigand kinez COSCO në portin e Pireut.

Synimi ynë është i ndërsjellë, që Pireu të mos bëhet vetëm porti më i madh në Mesdhe, por pse jo, edhe porti më i madh në Europë. Mbi të gjitha tashmë është duke u bërë qendra më e rëndësishme e tranzitit midis Evropës dhe Lindjes së Largët- tha kryeministri grek Mitsotakis.

Sipas kreut të qeverisë Greqia po zgjeron marrëdhëniet me Kinën në një moment kur ajo po rifiton rolin e liderit në rajon. Mitsotakis ju referua edhe rëndësisë së 16 marrëveshjeve dhe memorandumeve që nënshkruajnë dy palët në fushat e ekonomisë, teknologjisë, telekomunikimit, turizmit, kulturës dhe disa çështjeve juridike në fushën e agrobiznesit.

“Unë jam i sigurt që do të bëjmë maksimumin me komisionin e përbashkët të ekonomisë dhe tregtisë dhe të zgjerojmë vazhdimisht tregtinë në dy drejtime dhe investime të ndërsjella duke emetuar potencialin tonë në sektoret e energjisë, transportit dhe bashkëpunimit financiar-tha Xhin Pin.

Presidenti kinez që shpesherë ju referua filozofëve grekë të lashtësisë ka përshëndetur hapjen e bankave kineze në Greqi dhe rëndësisë së forcimit të fluksit të turistëve kinezë në vend. Kinezët që po përdorin Greqinë si një portë hyrje në zonën e BE-së shohin me interes një seri investimesh.

Vetëm në pesë vitet e fundit mbi 7000 kineze sipas një ligji të ri, kanë përfituar të ashtëquajturën “Vizën e Artë” duke marrë një leje të veçantë qëndrimi për vendet e BE, pasi kanë blerë pasuri të patundshme me vlerë mbi 250000 euro.

Top Channel