Papa Leone XIV mban meshën historike para miliona besimtarëve në Argjentinë: Puna e pasigurt, dhuna dhe ndarjet po shkatërrojnë familjet

Gjatë meshës së mbajtur në Monumentin e Spanjollëve, në Buenos Aires, në kuadër të vizitës së tij në Amerikën e Jugut, Ati i Shenjtë foli për sfidat me të cilat përballen familjet në shoqërinë e sotme.

“Edhe familjet tona, në fakt, përjetojnë ndonjëherë situata komplekse: mungesë stabiliteti, vështirësi sociale, punë të pasigurt, dhunë në familje, ndarje të dhimbshme, varësi që shkatërrojnë dhe dëmtojnë marrëdhëniet familjare”, deklaroi Papa Leone XIV në homelinë e tij.

Pavarësisht këtyre vështirësive, ai u bëri thirrje besimtarëve të mos dorëzohen dhe të ruajnë shpresën, duke e cilësuar Krishtin si shkëmbin mbi të cilin duhet të ndërtohet familja.

“Krishti, që është ‘shkëmbi’, e mbështet shtëpinë dhe e mbron atë nga stuhitë”, tha Papa.

Sipas autoriteteve dhe të dhënave të raportuara për meshën, në këtë ceremoni morën pjesë rreth 2.5 milionë besimtarë, duke e bërë atë meshën më të frekuentuar të drejtuar nga Leone XIV që prej zgjedhjes së tij në krye të Kishës Katolike.

Në fjalën e tij, Papa Leone XIV theksoi rëndësinë e familjes në shoqërinë moderne, duke kundërshtuar idenë se modeli i familjes së krishterë është i tejkaluar.

“Mos u dorëzoni përballë zërave që përsërisin se familja e krishterë është e tejkaluar: përkundrazi, sot më shumë se kurrë, ajo përfaqëson një pikë të fortë mbështetjeje mes pasigurive të shumta të epokës sonë”, u shpreh ai.

Papa vlerësoi gjithashtu rolin historik të familjes në formimin e identitetit kulturor dhe shoqëror të Argjentinës.

“Historia, kultura dhe shoqëria e Argjentinës kanë gjetur te familja burimin prej nga kanë marrë vlerat themelore të popullit”, tha ai.

Sipas Papës, familja ka qenë hapësira ku janë përcjellë besimi, virtytet njerëzore, kultura e punës, respekti për të moshuarit, mbrojtja e jetës dhe besnikëria ndaj fjalës së dhënë.

Duke folur për rolin e familjes në edukimin shpirtëror të brezave të rinj, Leone XIV theksoi se besimi nuk përcillet vetëm përmes fjalëve, por edhe përmes veprimeve të thjeshta të përditshme.

“Në intimitetin e vatrës familjare, besimi përcillet së bashku me jetën përmes gjesteve më të thjeshta: bekimit para vakteve, një lutjeje para se të shkohet për të fjetur, faljes dhe dëgjimit të ndërsjellë, gjyshërve që mësojnë të luten, pjesëmarrjes në meshën e së dielës, përgatitjes për të bërë një tërheqje shpirtërore apo një pelegrinazh”, deklaroi Ati i Shenjtë.

Ai shtoi se familja është vendi i privilegjuar për të njohur dhe takuar Krishtin. Papa Leoni XIV u shpreh gjithashtu se familjet kanë një mision të rëndësishëm edukues, përmes të cilit përcillet dhe përhapet Ungjilli.

Në përfundim, ai kujtoi edhe paraardhësin e tij, Papa Françeskun, i cili kishte shërbyer si ipeshkëv i Buenos Airesit.

“Papa ynë i dashur Françesku, i cili ishte ipeshkëv i këtij qyteti, e ka shprehur këtë me pasion: ‘Familja është e thirrur të ndajë lutjen e përditshme, leximin e Fjalës së Zotit dhe kungimin eukaristik, për të rritur dashurinë dhe për t’u shndërruar gjithnjë e më shumë në një tempull ku banon Shpirti’”, citoi Leoni XIV.

Në fund të homelisë, Papa ia besoi familjet argjentinase Virgjëreshës Mari, Nuestra Señora de Luján, dhe Shën Jozefit, duke u lutur që çdo shtëpi të bëhet një tempull i pranisë së Zotit.

Top Channel