“Ekzekutimi u kthye në makth”/ Dy injeksione dështuan, mjeku paralajmëron për djegie dhe dëmtime të rënda për 50-vjeçaren

50-vjeçarja mbeti e lidhur në barelë gjatë procedurës, ndërsa dëshmitarët raportuan se ajo lëvizte dhe përpëlitej pas dështimit të injeksioneve.

Mjeku Joel Zivot, profesor i asociuar i anesteziologjisë dhe kirurgjisë në Emory University School of Medicine dhe kritik i dënimit me vdekje, tha se problemet e hasura gjatë ekzekutimit ishin të parashikueshme.

Sipas Zivot, një nga problemet e mundshme mund të ketë qenë vendosja e gabuar e kateterit intravenoz. Në vend që pentobarbitali të hynte drejtpërdrejt në qarkullimin e gjakut, ai mund të ketë depërtuar në indet përreth krahut.

Kjo, sipas tij, mund të ketë shkaktuar djegie të konsiderueshme në një ose të dy krahët, të cilat mund të kërkojnë trajtim të gjatë, përfshirë edhe ndërhyrje të specializuara në lëkurë.

Avokati i Pike, Randy Spivey, tha se në zonat ku janë bërë injeksionet kishte shenja djegieje dhe flluskash.

Zivot paralajmëroi gjithashtu se Pike mund të ketë pësuar dëmtime të tjera serioze, përfshirë probleme kardiake, megjithëse gjendja dhe prognoza e saj përfundimtare ende nuk dihen.

“Christa është gjallë. Nuk kemi ende një ide të qartë për prognozën e saj apo ndonjë përditësim të rëndësishëm mbi gjendjen shëndetësore”, deklaroi avokati i saj.

Eksperti argumentoi se nëse dëmtimet e Pike janë aq të rënda sa shëndeti i saj nuk mund të rikthehet në një nivel të caktuar, çështja mund të ndikojë edhe në mundësinë e një ekzekutimi tjetër. Kjo, megjithatë, do të varet nga gjendja e saj shëndetësore dhe nga vendimet e autoriteteve dhe gjykatave.

Pike u dënua me vdekje për vrasjen e 19-vjeçares Colleen Slemmer më 12 janar 1995 në Knoxville, Tennessee. Në atë kohë, Pike ishte 18 vjeç.

Sipas prokurorisë, Pike dhe i dashuri i saj i atëhershëm, Tadaryl Shipp, planifikuan sulmin ndaj Slemmer. Viktima u josh në një zonë të pyllëzuar, ku u sulmua me një prerëse kutish dhe një copë të madhe asfalti. Shipp i skaliti gjithashtu një pentagram në trup.

Shipp, i cili ishte 17 vjeç në kohën e krimit, u dënua me burgim të përjetshëm me mundësi lirimi me kusht.

Pike nuk e ka mohuar vrasjen, por ka deklaruar se në atë kohë ishte një 18-vjeçare me probleme të shëndetit mendor.

Ekzekutimi i saj i dështuar vjen pas një tjetër problemi të ngjashëm në Tennessee. Në maj, ekzekutimi i të dënuarit Tony Carruthers u ndërpre pasi autoritetet nuk arritën të siguronin aksesin e nevojshëm intravenoz.

Pike vijon të jetë në spital, në gjendje kritike dhe nën kujdes mjekësor.

Top Channel