“Dështuat t’a mbronit”/ Foshnja 9-ditëshe ndërroi jetë pasi kokaina kaloi përmes qumështit të gjirit, prindërit shpëtojnë nga burgu

Vogëlushja Darcey u gjet pa ndjenja në një dhomë hoteli në Newquay, Cornwall, më 11 nëntor të vitit 2023. Sipas gjykatës, kokaina mund të ketë kaluar në organizmin e foshnjës përmes qumështit të gjirit.

Prindërit e saj, Rochelle Thomas, 30 vjeçe, dhe Andrew Maunder, 29 vjeç, kishin qëndruar në Hotel Victoria pak kohë pas lindjes së vajzës.

Shërbimet e emergjencës mbërritën në hotel, por foshnja u shpall e vdekur pak pas orës 11:00. Çifti u gjet në gjendje të rënduar emocionale në dhomë, ndërsa foshnja kishte gjak në fytyrë.

Të dy prindërit pranuan fajësinë për neglizhencë ndaj fëmijës. Në gjykatën e Truro u tha se të dy përdornin kokainë. Analizat toksikologjike treguan se Thomas kishte përdorur drogën gjatë dhe pas shtatzënisë, ndërsa Maunder e përdorte rregullisht.

Gjykata dëgjoi se gjurmë kokaine u gjetën në trupin e foshnjës, si dhe në rrobat dhe gishtat e prindërve. Substanca u gjet gjithashtu në një gotë pranë shtratit.

Gjykatësi Simon Carr i dënoi të dy me dy vjet e gjysmë burg, por dënimi u pezullua për tre vjet.

“Darcey kishte të drejtë të mbështetej tek ju për mbrojtjen e saj. Ju dështuat plotësisht ta mbronit”, tha gjykatësi, duke theksuar se varësia e prindërve kishte marrë përparësi ndaj kujdesit për foshnjën.

Gjykata mori parasysh gjendjen e rënduar psikologjike të të dyve. Thomas kishte përdorur drogën edhe si mënyrë për të përballuar stresin post-traumatik dhe depresionin, ndërsa Maunder u vlerësua për pendesën e shfaqur dhe problemet e tij të shëndetit mendor.

Përveç dënimit të pezulluar, të dy janë urdhëruar të ndjekin programe rehabilitimi për një vit, ndërsa Thomas do të marrë pjesë për gjashtë muaj në një program të posaçëm për rehabilitimin nga droga.

Top Channel