Rusia godet urën kryesore të Kievit, ndërpritet përkohësisht transporti publik, dy dronë hidhen në shënjestër

Autoritetet thonë se kontrollet fillestare nuk kanë evidentuar dëme kritike në strukturën e urës.

Sulmi ndodhi të enjten në mëngjes, ndërsa një tren metroje po kalonte mbi urë. Një nga dronët goditi bazën e një prej shtyllave qendrore të urës, ndërsa pasagjerët raportuan një shpërthim të fortë dhe pluhur që hyri në vagon përmes sistemit të ventilimit.

Pavarësisht dëmtimit të shkaktuar nga shpërthimi, autoritetet e Kievit deklaruan se vlerësimet paraprake nuk treguan dëmtime kritike në strukturën kryesore të urës.

Pas goditjes, qarkullimi i trenave të metrosë u pezullua përkohësisht. Një tren që ndodhej mbi urë u drejtua drejt stacionit Vydubychi, në bregun perëndimor të Dnieperit, ndërsa më vonë u lejua edhe rifillimi i trafikut rrugor.

Gazetarja ukrainase Mariana Mykytenko, e cila ndodhej në një nga trenat, tha se pasagjerët dëgjuan paralajmërime për një dron “Shahed” përpara shpërthimit.

Sipas saj, askush në vagonin ku ndodhej nuk u plagos.

Sulmi ndaj urës erdhi pas një tjetër goditjeje me dron në Kiev. Rreth orës 09:00 sipas kohës lokale, një dron u përplas në katin e tretë të një shkolle.

Në momentin e goditjes, në ndërtesë ndodheshin më shumë se 100 nxënës, por ata ishin zhvendosur në strehë dhe nuk pati të plagosur.

Drejtoresha e shkollës, Valentina Chorna, tha se ndërtesa pësoi dëmtime, përfshirë shembjen e pjesshme të një muri.

Sulmet e fundit në Kiev vijnë në një periudhë kur Rusia ka shtuar përdorimin e dronëve kundër infrastrukturës ukrainase.

Zyrtarët ukrainas kanë paralajmëruar gjithashtu për përdorimin e modeleve të reja të dronëve me motorë reaktivë, të cilët kanë shpejtësi më të lartë dhe mund të paraqesin vështirësi shtesë për sistemet e mbrojtjes ajrore.

Top Channel